Moti i keq me reshje dëbore dhe shiu ka përfshirë thuajse të gjithë territorin e Shqipërisë.
Në mesditë, Bashkia Fushë Arrëz njoftoi se ka shpallur gjendjen e jashtëzakonshme për t’u ardhur në ndihmë banorëve të izoluar nga dëbora në njësitë administrative malore Iballë, Blerim, Fierzë e Qafë-Mali. Trashësia e dëborës ka shkuar 1 metër, ndërsa zona të tëra janë pa energji elektrike.
Një situatë alarmante është krijuar edhe në Lezhë për shkak të erës së fortë dhe reshjeve të dëborës. Problematike gjatë ditës së sotme ka qenë edhe lëvizja e mjeteve në aksin e vjetër Milot-Lezhë, ku për shkak të reshjeve dhe erës së fortë, një kamion është përmbysur në anë të urës.
Pas reshjeve të dendura të dëborës i gjithë rrethi i Bulqizës është gjatë pasdites është pushtuar nga ngricat dhe temperatarat e ulëta deri në minus 10 gradë. Ulja e temperaturave ka vështirësuar edhe më tepër qarkullimin e mjeteve por jo vetëm.
Ngricat kanë vështirësuar edhe lëvizjen e banorëve në qytetin e Bulqizës, ku për shkak të akullit të formuar në rrugë, disa banorëve u është rrezikuar jeta, pasi janë rrëzuar në pedonalen e qytetit.
Moti i keq që ka mbizotëruar edhe në 7 bashkitë e Qarkut të Elbasanit ka krijuar probleme të shumta në furnizimin me energji elektrike në shumicën e fshatrave malorë të bashkive Elbasan, Prrenjas,Gramsh e Librazhd ku era e fortë dhe reshjet e dendura të dëborës kanë dëmtuar pjesë të konsiderueshme të rrjetit shpërndarës të energjisë elektrike si edhe mjaft shtylla të tensionit të mesëm.
Trashësia e dëborës mbrëmjen e kësaj të shtune në disa fshatra malorë të këtij qarku ka arritur të paktën 40 cm. Në bashkinë e Librazhdit për shkak të trashësisë së madhe të dëborës janë bllokuar rrugët në fshatin Kostenjë në Njësinë Administrative Lunik, në Qafë Dardhë në Njësinë Adminitrative Polis në ,Qarrishtë në Njësinë Administrative Qender, në Lagjen Mali i Xhyrës të Njësisë Administrative Hotolisht.
Në bashkinë e Librazhdit segmenti i rrugës Lunik-Steblevë aktualisht i kalueshëm vetëm me zinxhirë.Ndërkohë ka mungesë të energjisë elektrike në disa nga fshatrat e Njësisë Administrative Hotoloshisht dhe në fshatrat Gurshpatë e Vilan në Njësinë Administrative Polis .
Qyteti i Prrenjasit dhe fshatrat e kësaj bashkie janë mbuluar të gjithë nga dëbora, ndërsa temperaturat janë ulur ndjeshëm duke e bërë mjaft të vështirë lëvizjen jo vetëm të automjeteve, por edhe të këmbësorëve.
Reshjet me intensitet të lartë të dëborës dhe ngricat kanë bllokuar qarkullimin në aksin Prrenjas-Qafë Thanë.
Përmes një njoftimi, Policia e Elbasanit bënë me dije se në aksin rrugor “Librazhd-Qafë thanë” lëvizja e automjeteve kryhet vetëm me zinxhirë, ndërkohë është bllokuar lëvizja e mjeteve të tonazhit të rëndë.
Ndërkohë, reshjet e dëborës janë prezente në të gjithë qarkun e Korçës, teksa raportohet se subjektet kontraktore janë duke kriposur dhe mirëmbajtur akset kryesore nacionale e ato turistike.
Në terren janë 21 borëpastruese, 8 fadroma, 11 kamionçina dhe 7 kamiona, kryesisht në akset Qafë Thanë- Pogradec- Korçë-Kapshticë, Korçë-Ersekë, Leskovik-Çarshovë, Korçë-Voskopojë, Boboshticë-Dardhë, K/Zëmblak-Doganë- Goricë, Maliq-Lozhan Moglicë, Podgorie-K/Zvezdë, Bilisht-Miras.
- Lumi Ishëm del nga shtrati në Krujë
Fryrja e madhe e lumit Ishëm ka bërë që ai të dalë nga shtrati në fshatin Murqinë të Krujës duke përmbytur dhjetëra hektarë tokë.
Reshjet që vijojnë tashme prej orësh kanë bërë që niveli i lumit Ishëm të rritet ndjeshëm e për pasojë të dalë nga shtrati në disa pika.
Më problematike, situata paraqitet në fshatin Murqinë, ku është përmbytur dhe rruga e lagjes fundore të këtij fshati e cila aktualisht është e kalueshme vetëm me mjete te larta.
Gjithashtu, prezencë uji nëpër ara ka dhe në Bilaj, Derven, Mallkuc etj.
- Akset rrugore
Në Rrugën e Arbrit po punojnë 5 borëpastruese. Në pjesën e bypass-it të Murrizit rekomandohet përdorimi i zinxhirëve për shkak të vështirësive në qarkullim.
Edhe në rrugën e Kombit, pavarësisht reshjeve të dëborës, vijon qarkullimi i automjeteve.
Në segmented Peshkopi-Maqellarë dhe Ulëz-Burrel vazhdojnë reshjet e dëborës. Mjetet borëpastruese po punojnë pa ndërprerje dhe segmentet janë të hapura.
Në akset Vau Dejës-Pukë-Kukës, Ura e Çerenecit-Bulqizë ka reshje të shumta dëbore. Po punohet me 4 borëpastruese. Qarkullimi kryhet me vështirësi dhe me kujdes, veçanërisht në segmentin Fierzë-Qafë Shllak pasi era e fortë përhap dëborën nga bankina në rrugë.
Edhe në akset Qafë Plloçë-Maliq, Zëmblak-Dogana Goricë, Korçë-Ersekë, Korçë-Dogana Kapshticë kanë nisur reshjet e dëborës me intensitet, po punohet me borëpastruese për pastrimin e tyre. Qarkullimi vijon normalisht.
- Probleme me energjinë elektrike
Si pasojë e motit janë 37 fidera jashtë pune. Situata më e rënduar me defekte konstatohet në rajonin e Burrelit, Shkodrës dhe Kukësit, ku stakimi i energjisë ka ardhur si pasojë e këputjes së përcjellësave, thyerjes së izolatorëve apo dëmtimi i kabllove. Defektet më së shumti janë evidentuar në zonat e thella rurale ku linjat janë ajrore. Gjithashtu, ka pësuar defekt edhe një prej fiderave të nënstacionit Lezhë, i cili furnizon me energji elektrike Hidrovorin Gocaj dhe Fideri 7 N/St Lezhë që furnizon me energji elektrike hidrovorin Grykëzezë. Të gjitha linjat 35Kv, si dhe fiderat e tjerë dalës 20/10/6 KV që furnizojnë hidrovorët janë në skemë normale të furnizimit me energji elektrike.
Prej mëngjesit të sotëm, si pasojë e erës së fortë, janë stakuar linja 400 kV Tirana 2 – Podgoricë dhe Tirana 2-Koman, pa ndikim tek konsumatorët. Situata në kaskadën e Drinit paraqitet normale.
- Portet dhe aeroportet
Në Portin e Durrësit situata oparaqitet normale. Tragetet kanë mbërritur në kohë dhe në terminalet portuale vijon pa ndërprerje përpunimi i mallrave. Edhe në Portin e Vlorës nuk raportohen problematika. Lëvizja e tragetit ka vijuar sipas orarit të parashikuar. Aeroporti ndërkombëtar “Nënë Tereza” ka vijuar punën normalisht pa vonesa apo anulime. Edhe në aeroportin ndërkombëtar të Kukësit nuk janë evidentuar problematika.
