Gazeta greke “Kathimerini” ka publikuar një tjetër artikull ditën e sotme rreth integrimit të Shqipërisë në BE, ku raporton se Greqia duke e vendosur ta bllokojë përsa kohë Fredi Beleri nuk lejohet të bëjë betimin si kryebashkiak i zgjedhur i Himarës.
Së fundmi, Greqia ka bllokuar lidhjen e një marrëveshje mes BE-së dhe Shqipërisë për bashkëpunim në fushën e mbrojtjes. Pak ditë më parë në Bruksel u mbajt një takim në nivel teknik me synim lidhjen e disa marrëveshjeve në fushën e mbrojtjes dhe sigurisë brenda BE-së por dhe me shtete të tjera jashtë unionit, përkatësisht me Kanadanë, Japoninë, Ganën, Moldavinë, Norvegjinë dhe Korenë e Jugut.
“Kathimerini” raporton se pala greke ka shprehur kundërshtime për Shqipërinë. Dhe për këtë, Greqia tha se së pari Shqipëria duhet të garantojë respektimin e shtetit të së drejtës.
Në këtë kontekst, Greqia kundërpropozoi që shteti më i përshtatshëm, që është dhe aspirant për të hyrë në BE, për të lidhur një marrëveshje në fushën e mbrojtjes me Bashkimin Europian, të jetë Maqedonia e Veriut.
“Ka treguar performancë më të mirë në fushën e sundimit të ligjit, ndërsa standarizimi i Forcave të Armatosura sipas standartit perëndimor ka përparuar me ritëm jashtëzakonisht të shpejtë”, shkruan Kathimerini duke pasqyruar qëndrimin e palës greke në takimin e Brukselit.
Megjithatë, propozimi i Greqisë për Maqedoninë e Veriut nuk u pranua. Por edhe çështja për Shqipërinë nuk u vazhdua më tej, edhe pse, sipas “Kathimerini”, Italia shprehu mbështetje shumë të fortë për Tiranën zyrtare.
E në këtë pikë pati dhe përplasje mes Greqisë dhe Italisë për shkak të qëndrimit të palëve dhe mbështetjes që Italia po i jep Shqipërisë. Partneritetet e BE-së me vende të treta janë pjesë e një plani të Brukselit të quajtur strategjia e Europës 2030.
