Analisti Andi Bushati i ftuar në emisionin “Të Paekspozuarit” në MCN TV, teksa foli për ndotjen e ajrit në Tiranë, që çdo vit merr jetë njerëzish, tha se sot nuk është bërë asnjë plan urbanistik dhe nuk kemi asnjë matje sa kemi hapësirë gjelbërimi.
Sipas tij në komunizëm, plani urbanistik kishte lënë 5.5 metër katror gjelbërim, ndërsa sot e kemi 0.7.
“Për të vënë në balancë se ku jemi. Kur Enver Hoxha, Ramiz Alia dhe Adil Carcani, bënë planin urbanistik, lanë 5.5 metër katror gjelbërim, sot e kemi 0.7. Ajo diktatura e tmerrshme, e rriste njeriun shqiptar në gjelbërim. Këta edhe këtë ia kanë hequr.
Ku janë vendimmarrësit tanë të ndërgjegjshëm që po bëjnë krim? Kam bërë një shkrim, që analizojë të gjithë fotot e retushuara të Veliajt. Fshihen kullat nga mbrapa. Pra fotot përpunohen dhe fshihen kullat. Këta janë të ndërgjegjshëm që po bëjnë krim. Një njeri që mendon se po zhvillon qytetin, e lë kullën mbrapa, nuk e heq.
Ne na kanë etiketuar edhe si kullofobë. Ndotja e ajrit në Tiranë, nuk është vetëm çështje ndërtimi, por edhe monopoli i tregut të karburanteve, ku nuk ka asnjë kompani ndërkombëtare. Këtu është treg lokal, i kthyer në monopol, që nuk kemi matje. Benzeni është katërfish në Tiranë më i lartë se norma e lejuar evropiane. Kemi një plan gjenocidial të vrasjes së gjithfarëllojshme”, tha Bushati.
