“Një akt të turpshëm dhe antikushtetues” Kështu e ka konsideruar kreu i grupit parlamentar të PD-së, Gazment Bardhi vendimin e Presidentit të Republikës, Bajram Begaj për të dekretuar ndryshimet në ligjin për Komisionet Hetimore të miratuara në mënyrë të njëanshme dhe padiskutime nga mazhoranca.
Në një deklaratë për mediat, Bardhi tha se vetë kreu i shtetit i ka evidentuar problematikat në ligj, por sipas tij, vepron në bazë të aprovimeve nga kryeministri Edi Rama. Deputeti demokrat tha më tej se presidenti Begaj mashtron kur thotë se opozita ka shmangur një dialog politik.
Gjithashtu, Bardhi bëri me dije se e kishte njoftuar kreun e shtetit për atë se çfarë do të ndodhte të hënën në Kuvend, por ai, sipas tij, vendosi të keqpërdoret nga Rama.
“Nëse lexoni njoftimin e Presidentit do të gjeni parimin që presidenti ka mbi zbatimin e kushtetutës. Shpallja e ligjit sot është bërë në parimin që nëse Rama do të jepte dakordësinë për ta rishikuar, presidenti do gjente argumente kushtetues për ta kthyer ligjin. Këtë thotë njoftimi i presidentit, i cili ndër të tjera citon edhe një të pavërtetë, që thotë se opozita ka shmangur një dialog politik. E vërteta është që opozita prej tre muajsh është në betejë në Kuvend për të kërkuar të drejtat dhe në cdo mesazh që kemi përcjellë kemi shprehur gatishmërinë për të gjetur zgjidhje.
Ka qenë mazhoranca ajo, që nuk ka patur asnjë reflektim, por në të kundër ka shtuar masat arrogante ndaj opozitës. Prandaj dhe Begaj pas sjelljes së tij të hënën, unë e kam njoftuar kabinetin e Presidentit, mbi atë që do të bënim në seancë dhe ishte zgjedhja e tij që të keqpërdorej nga Rama. Presidenti nuk ka pasur asnjë reflektim, nuk ka bërë asnjë përpjekje për dialog politik. Sot Presidenti humbi mundësinë të jetë mbi palët dhe të jetë garant i kushtetutës. Pra nëse ne bie dakord me mazhorancën presidenti e kthen ligjin për rishqyrtim. Në fakt detyra është ta kthejë kur konstaton problematika dhe vetë presidenti ka konstatuar problematika.
Sot presidenti na tha që ai të ushtojë kompetencat e tij kushtetuese duhet të japë aprovimin e tij Edi Rama. Miratimi i ligjit ishte një akt i turpshëm i presidentit dhe ligji është anti-kushtetues. I bëj thirrje presidenti të ngrihet në lartësinë e detyrës Pra nëse ne bie dakord me mazhorancën presidenti e kthen ligjin për rishqyrtim. Në fakt detyra është ta kthejë kur konstaton problematika dhe vetë presidenti ka konstatuar problematika”, tha Bardhi.
