Sali Berisha është thirrur të paraqitet të enjten në ambientet e Prokurorisë së Posaçme.
Por menjëherë pas njoftimit të SPAK-ut, mbrojtja e ish-kryeministrit ka kërkuar shtyrje të seancës, pasi avokatët nuk mund të jenë të pranishëm. Kërkesën drejtuar Prokurorisë së Posaçme Anti-korrupsion, e ka konfirmuar për mediat, avokati Sokol Mëngjesi. Sipas tij, kanë një axhendë tjetër dhe nuk mund të vijnë në orën 10:00 për të shoqëruar Berishën.
Ndërkohë, SPAK ka thirrur për të enjten edhe dhëndrin e Berishës, Jamarbër Malltezin.
Berisha akuzohet nga SPAK për kryerjen e veprës penale “Korrupsioni pasiv i funksionarëve të larte shteterore ose te zgjedhurve vendore, kryer në bashkëpunim. Ish-kryeministri i ka konsideruar akuzat ndaj tij dhe dhëndrit të tij Jamarbër Malltezi, si sulm politik, pasi sipas tij, nuk ka asnjë fakt dhe dokument që të ngrihen dyshimet mbi akuzat.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”.
Ndërsa, për Jamarbër Malltezin dhe ndërtuesin Fatmir Bektashi, SPAK-u deklaron se ata kanë përfituar shuma të mëdha financiare nga tjetërsimi i truallit në ndërtime të larta. Mbi këta dy të fundit rëndojnë akuzat për veprat penale “Korrupsioni pasiv i funksionareve te larte shtetërore ose te zgjedhurve vendore”, kryer në bashkëpunim dhe “Pastrimi i produkteve te veprës penale ose veprimtarisë kriminale”.
