Nga Boldnews.al
Është një nga personazhet që ka qëndruar më gjatë për ty pyetur në mjediset e Prokurorisë Speciale, SPAK. Mban rekordin pasi në të paktën tre raste ka qëndruar mbi nëntë orë. Hy, dil, jep ndonjë deklaratë të shkurtër dhe ik. Po çfarë duhet më shumë për të hetuar SPAK-u për ish-ministrin e Shëndetësisë i cili ka të paktën tre dosje pirg, duke nisur nga konçesioni i sterilizimit, konçesioni i analizave dhe abuzimet me fondet e BE-së?
Kjo që po ndodh në SPAK me ish-ministrin i kalon kufijtë e groteskes. Ai është marrë minimalisht 27 orë në pyetje dhe për të nuk ka asnjë vendim. Asnjë prokurorr deri më pani nuk po guxon të shkruaj dy rreshta letër për të lëshuar “urdhër-arresti”, ose nëse nuk e bëjnë diçka të tillë, atëherë Beqjan duhet ta lenë tërësisht të lirë, as mos e pyesin, as mos e shqetësojnë më.
Asnjë nga këto të dyja nuk po ndodh, por po japin një shfaqje të shëmtuar, duke bërë sikur po punojnë me intesitet të madh dhe më pas si mjeshtër i komunikimit, Beqja del si i mërzitur dhe i lodhur për të treguar se marrja në pyetje ishte serioze dhe se ai është i gatshëm të sqaruar çdo dyshim dhe mbetet po gjithnjë i hapur për drejtësinë. Pikërisht këtë drejtësi të re që si “baba biologjik” ka Ramën… Ama edhe vetë Beqja me të drejtë po i sfidon SPAK-istat.
Tre herë nga nëntë orë Beqja u mbarsi njerëzve të drejtësisë së re “frikën për të vepruar”. Kokëulur duhet të dalin prokurorë e punonjës të BKH-së që në mëngjes shfaqen si të pavarur që zbatojnë ligjin dhe pas nëntë orësh ikin të lodhur dhe me një autucensurë frike, se “miku i ‘babait’ që na polli, nuk duhet prekur”…
Beqja është një individ që në shumë raste ka pasur akuza të rënda, politike, mediatike apo edhe institucionale. Një personazh “interesant për Ramën” që e donte në çdo formë e mënyrë pranë tij. I dashuruar pas pasurisë, Beqja la gjurmë të rënda pas, duke mos u ruajtur aspak në aktivitete minimalisht të dyshimta si afera korruptive.
Ka edhe më rëndë, gati në kufijtë e të pabesueshmes. Pikërisht në kohën kur Beqja thirrej në SPAK, nën hetim për çështjen e sterilizimit të pajisjeve kirurgjikale, ai vijonte të “bënte ca lekë” edhe me fatura fiktive. Të paktën këtë e thonë vetë “SPAK-sat” që dyshojnë se ish-ministri dhe bashkëpunëtorët e tij kanë abuzuar edhe me fondet e BE-së. Ai ishte drejtor i SASPAC, një post që ia dha Rama.
Vetë prokurorët e SPAK dhe ata të BKH-së janë fort të ftilluar se materialet për çështjen Beqja ulërasin pasi çdo copë letre, konçesion, tender dhe “pjatë sallate” në “Gzonën” e pushtetit, ka pas një aferë të dyshuar. Çfarë presim më? Edhe sa orë të tjera Beqja do të bëjë sikur merret në pyetje gjatë e më gjatë? Minimalisht prokurorët nuk duhet të japin një shfaqje të pështirë që në fakt është propagandë, që sherben si ushqim i skaduar për qytetarët, pa e kuptuar se jo pak por të paktën tre herë nga nëntë orë rresht janë mbarsur fort e më fort nga të fuqishmit e pushtetit.
