Gjykata e Posaçme kundër Korrupsionit dhe Krimit të Organizuar ka kaluar për gjykim çështjen ndaj kryebashkiakut socialist të Kuçovës, Kreshnik Hajdari.
Vendimi është marrë këtë të mërkurë, teksa mbi Kreshnik Hajdarin rëndon akuza për “falsifikimi i vulave, i stampave ose i formularëve”, pasi kishte gënjyer në formularin e dekriminalizimit, ër shkak se nuk kishte deklaruar për dënimin në Greqi. Në të njëjtin, vendim GJKKO pranoi gjykimin e shkurtuar për kryebashkiakun Hajdarin.
Kujtojmë se kryebashkiaku socialist i Kuçovës, Kreshnik Hajdari është marrë i pandehur nga Prokuroria e Posaçme (SPAK) nën akuzën për veprën penale “falsifikim të formularëve”.
Sipas Prokurorisë, Hajdari rezulton që në 23 qershor të vitit 1999 është dënuar me vendim të formës së prerë nga Gjykata e Shkallës së parë të Janinës për hyrje në territorin grek pa leje.
Nga verifikimet e Prokurorisë, gjithashtu konfirmuar nga ministria e Drejtësisë greke, Kreshnik Hajdari rezulton i bashkëgjykuar i mitur dhe është dënuar me “masa riedukuese e qortimit”. Sipas drejtësisë greke, i pandehuri në atë kohë me statusin punëtor, ka qenë i pranishëm në procesin gjyqësor.
Kjo çështje u shqyrtua një herë nga Komisioni Qendror të Zgjedhjeve, por kryekomisioneri Ilirjan Celibashi vendosi ta “falë” Kreshnik Hajdarin duke mos i ndërprerë mandatin e kryebashkiakut. Sipas Celibashit, KQZ për të tilla raste e kishte tashmë një praktikë të konsoliduar, duke vlerësuar se nuk ka një shkak ligjor që kryetarit bashkisë Kuçovë t’i ndërpritet mandati.
Gjithsesi, Komisioni i Ankimeve dhe Sanksioneve (KAS) vendosi më 5 janar që ta shfuqizojë atë vendim të Celibashit dhe e detyroi KQZ-në që ta rishqyrtojë edhe një herë çështjen e mandatit të Kreshnik Hajdarit.
Sipas juristëve të koalicionit “Bashkë Fitojnë”, mjafton vetëm mos deklarimi në formularin e dekriminalizimit të dëbimit të zotit Hajdari në vitin 1999 nga Greqia për t’i ndërprerë mandatin.
