Kryetari i grupit parlamentar të Partisë Demokratike, Gazment Bardhi ka reaguar lidhur me deklaratat e kryeministrit Edi Rama për Reformën Zgjedhore në konferencën me gazetarët gjatë ditës së sotme.
Në një postim në rrjetet sociale, Bardhi shkruan se kryeministri Rama, sipas tij, nuk ka interes të bëjë asnjë reformë që i shërben qytetarëve shqiptarë.
“Edi Rama nuk ka interes të bëjë asnjë reformë që i shërben qytetarëve shqiptarë. Pohimi në publik se po djeg me vetëdije Komisionin e Reformës Zgjedhore që të mos u japë shqiptarëve një reformë konsensuale dhe gjithëpërfshirëse që garanton standartet minimale për zgjedhje të lira dhe të ndershme, tregon edhe njëherë mendësinë e rrezikshme antidemokratike që ka Kryeministri i Shqipërisë për të mbajtur pushtetin me mjete antidemokratike.” – shkruan kreu i grupit parlamentar të PD-së.
Bardhi shton se deklaratat e Ramës sipas tij, provojnë se sa e drejtë është beteja e opozitës në Kuvend dhe se Shqipëria ka nevojë për një Reformë Zgjedhore reale, konsensuale dhe gjithëpërfshirëse që adreson të gjitha rekomandimet e OSBE-ODIHR.
“Deklaratat e sotme të Edi Ramës provojnë edhe njeherë sesa e drejtë është beteja e opozitës në Kuvend. Shipëria ka nevojë për një Reformë Zgjedhore reale, konsensuale dhe gjithëpërfshirëse që adreson të gjitha rekomandimet e OSBE-ODIHR dhe që krijon kushtet e barabarta të garës reale për çdo palë politike në zgjedhje”, shkruan Bardhi.
Kujtojmë se Edi Rama tha se ka ardhur dita që edhe tradita e komisioneve bipartizane të mbarojë, duke u nisur nga fakti që sipas tij nuk kemi më dy palë, por shumë
“Nuk ka asnjë shans që kjo të na bëjë ne që të pranojmë keqkuptimin. Të pranojmë që ushtrimi i forcës fizike, përdorimi i krahëve, këmbëve, duarve si instrumente të forta të na imponohet për argumente me të cilat ne nuk jemi dakord. E njëjta gjë edhe për reformën zgjedhore. Ka një afat komisioni dhe do bëjmë edhe pa komision. Komisioni vjen si traditë dhe jo si normë ndërkombëtare. Parlamente të tjera nuk ngrenë komisione parlamentare. I bëjnë reformat zgjedhore me votat që kanë. Aty kur nuk kanë, nuk i bëjnë. Kjo është, dhe këtu ka ndryshuar kohët. Një komision bipartizan me 7 ballistë e një partizan nuk i bëjmë dot, duhet të kesh dy partizanë, nuk i kemi më. Kemi një partizan dhe 7 ballistë. Si ta bëjmë këtë gjë?. Kemi folur për komisionin e reformës zgjedhore dhe kemi dalë në konkluzionin që; do ishte mirë të bëhej, por nëse nuk bëhet nuk është fundi i botës. Mbase ka ardhur dita që edhe tradita e komisioneve bipartizane të mbarojë, duke mbajtur shënim faktin që nuk kemi më dy palë, por shumë” – tha Rama.
