Vrasja e 23-vjeçarit, Gëzim Sinomati dy ditë më parë në Vlorë, vijon të jetë në sitën e hetimeve teksa detaje të reja dalin në dritë.
Nga hetimet e deritanishme dyshohet se Sinomati është qëlluar nga sedija e pasme e makinës ‘BMW’ në një distancë rreth 34-40 metra, e cila rezulton e vjedhur dhe me targa të dubluara. Ndërkohë në pjesën e pasmet të makinës së djegur është gjetur një bllok betoni.
Grupet hetimore ngrejnë dyshime se autorët kanë qenë vrasës profesionistë me pagesë të cilët pas krimit kanë planifikuar edhe fshehjen e gjurmëve. Ndërkohë deri më tani nuk është gjetur as arma dhe as gëzhoja. Sakaq janë mbledhur rreth 50 kamera sigurie të bizneseve, të cilat do tu shërbejnë hetimeve për zbardhjen e plotë të rastit.
Kush është i riu që u ekzekutua
Gëzim Sinomati është djali i Sokol Sinomatit, i njohur me nofkën nofkën “Buzderi” dhe si anëtar i bandës së Gazmend Brakës alias “Gaxhai”, në vitin 1997 në Vlorë. Sokol Sinomati u arratis nga burgu i Peqinit në vitin 2017. Asokohe, ai mori leje, por nuk u kthye më në qeli. Në vitin kur ai u arratis, Sokol Sinomataj vazhdonte të vuante dënimin per vrasjen e Elton Tatos dhe plagosjen e Robert Borakut, ngjarje që sipas vendimit të gjykatës së Vlorës, ka ndodhur në 26.06.2002.
Dyshimet paraprake të grupit hetimor janë se Gëzim Sinomati është ekzekutuar për hakmarrje. Një tjetër pistë që po hetohet janë dhe konfliktet e mundshme që i riu mund të ketë pasur jashtë vendit.
