Taulant Balla ka bërë analizën vjetore të Ministrisë së Brendshme.
Në një konferencë për mediat, Balla paralajmëroi se ndryshimi në ligjin për policinë do të bëhet me qëllim rritjen e profesionalizmit në Policinë e Shtetit dhe rritjen në karrierë të efektivëve brenda kësaj organizate.
“Po përgatisim ndryshime rrënjësore në Ligjin për Policinë e Shtetit, jemi në fazën finale, para miratimit në Qeveri, për ta dinamizuar dhe energjizuar trupën drejtuese të Policisë dhe përmirësuar karrierën. Akademia e Sigurisë, është tashmë një Institucion i Arsimit të Lartë.
Gjatë vitit 2023, janë pranuar në Akademinë e Sigurisë, për “Patrullë e përgjithshme”, 607 vajza dhe djem, ndërsa në Fakultetin për Hetimin e Krimit janë pranuar 41 ekselentë dhe 246 për studimet “Bachelor”. Gjatë vitit 2024, do të pranohen edhe 400 kursantë për “Patrullë e përgjithshme”, 100 ekselentë dhe 29 për funksione të veçanta.
Gjithashtu, në shtator, nëpërmjet Maturës Shtetërore, synpjmë të pranpjmë 150 maturantë, për studimet “Bachelor”. Synimi im është që të zgjidhim plotësisht nevojat për burime njerëzore në Policinë e Shtetit brenda vitit 2025, për të synuar më pas edhe një rritje të numrit total të Policisë së Shtetit”, tha fillimisht ministri i Brendshëm Taulant Balla.
Balla ka deklaruar se 11 mjete të reja zjarrfikësish do t’i shtohen repartit të zjarrfikëses. Balla theksoi se këto mjete do të hyjnë në punë për shuarjen e zjarreve gjatë verës. Ndërkohë që u bëri thirrje qytetarëve që të heqin dorë nga çdo zjarrvënie gjatë verës.
“Është e vërtetë që vera e zgjatur e vitit 2023 na ndihmoi për një zgjatje të sezonit turistik, por shkaktoi një numër të madh zjarresh në vend. Por dua t’i bëj thirrje çdo qytetari të këtij vendi të heqi dorë nga çdolloj zjarrëvenie. Kodi penal parashikon deri në 15 vjet burg. Zjarri një herë ndodh dhe ka një ç’kujdesje nga të gjithë për masat mbrojtje. E vërteta është që kam qene vetë personalisht në të treja rastet e zjarrit të ndodhura në vend. Edhe mund të konfirmojë që gjithçka lidhet me ndërhyrjen e forcës së parë dhe ne po marrim masa për rritjen e kapaciteteve për shuarjen e zjarrit. Gjatë vitit 2024 do të kemi 11 automjete të reja për të shuar zjarret”, tha fillimisht Balla.
“Lajmi më i bukur i vitit që mbyllëm nuk ishte vetëm shifra 10.155.640 shtetas të huaj që vizituan Shqipërinë, por çertifikimi ndërkombëtar i Shqipërisë sonë si një destinacion europian me bukuri natyrore, mikpritje të pakonkurueshme dhe siguri mbresëlënëse. Sot mund ta themi me kokën lart dhe me krenari se Shqipërisë i është pastruar një herë e mirë imazhi i nxirë nga një e shkuar e rëndë shumëvjeçare. Siguria publike gjatë vitit 2023, ishte një test i rëndësishëm pasi çertifikoi vendin tonë si një destinacion të sigurt turistik, me ZERO ngjarje kriminale të qëllimshme, ndaj jetës së turistëve të huaj të cilët zgjodhën Shqipërinë për të pushuar.”, vijoi Balla.
