Një 51-vjeçar është arrestuar nga policia e Pogradecit, pasi ka tentuar të trafikonte në drejtim të Maqedonisë së Veriut me taksinë e tij, dy çanta me lëndë narkotike kanabis dhe armë zjarri me municion.
Në kuadër të operacionit policor të koduar “Taksisti” është vënë në pranga shtetasi Murat Manuka, banues në Paskuqan, Tiranë.
“Shërbimet e Policisë, në bazë të informacioneve të siguruara nga inteligjenca informative se një shtetas po lëvizte në dalje të qytetit të Pogradecit, me një automjet taksi, me të cilin dyshohej se mund të trafikonte në drejtim të Maqedonisë së Veriut, lëndë narkotike dhe armë zjarri, koordinuan veprimet dhe tek vendi i quajtur “Lumi i Tërhanit”, Pogradec, bënë ndalimin e këtij automjeti, me drejtues shtetasin Murat Manuka. Gjatë kontrollit në bagazhin e automjetit, u gjetën 8.2 kg lëndë e dyshuar narkotike kanabis, e futur në dy çanta, dhe 1 armë zjarri automatik model “Scorpions”, me krehër me fishekë, të cilat u sekuestruan në cilësinë e provës materiale.” – thuhet në njoftimin e Policisë.
Veprimet procedurale për këtë rast u kryhen nga specialistët e Seksionit për Hetimin e Narkotikëve të Policisë së Korçës, të cilët po vijojnë punën për identifikimin dhe vënien përpara përgjegjësisë ligjore të shtetasve të tjerë të implikuar në këtë veprimtari kriminale.
Materialet procedurale i kaluan Prokurorisë së Korçës për veprime të mëtejshme.
