Vitit 2023 i erdhi fundit dhe në Barcelonë është koha për bilance. Ka qenë në fakt një vit mjaft i suksesshëm për ekipet e futbollit të meshkujve dhe të femrave.
Por natyrisht që ka pasur dhe zhgënjime e probleme.
DËMTIMI I GAVIT – NOTA 0 – Mesfushori 19- vjeçar i Barçës, “zemra dhe shpirti i Barçës”, siç e përshkroi Ksavi, u dëmtua me diagnozën këputje e ligamentit të kryqëzuar dhe thyerje menisku. Sezon i përfunduar për të.
“COPA DEL REY” – NOTA 1 – Zhgënjimi i vetëm e ekipit të femrave ishte eliminimi nga Kupa e Mbretit në sezonin 2022-23. Dhe jo për fajin e saj, por pakujdesinë e klubit që aktivizoi një lojtare të pezulluar!
IKJA E DEMBELESË – NOTA 2 – Pas gjashtë sezoneve në Barcelonë, Osman Dembele u transferua te PSGja në momentin e tij më të mirë, duke zhgënjyer trajnerin Ksavi që u investua personalisht te ai. Përfitimi i vetëm i Barçës, 35 milionë euro në arkat e rrënuara të klubit.
RASTI “NEGREIRA” – NOTA 3 – Shpjegimet e Barcelonës nuk kanë arritur të pastrojnë njollën për pagesat që i janë bërë zëvendëspresidentit të Komitetit Teknik të Gjyqtarëve, Enrikez Negreira: 7 milionë euro në periudhën 2001-2018. Thesari nuk gjeti prova se pagesat ndaj Negreiras ndikuan rezultatet dhe Laporta flet për një fushatë shpifjeje, por…
TRANSFERTAT MAKTH – NOTA 4 – Katër transferta europiane, 3 humbje (Junajtid- “Europa League”, Shahtjor Donjetsk e Antverp-”Champions”) është bilanci i Barçës. Barça në vitin 2023 ose përmirësohet jashtë shtëpisë në Europë, ose rruga do të jetë e shkurtër.
NUMRI 5 I BUSKETS – NOTA 5 – Numri 5 i Barçës, u largua nga dera e madhe si kampion në Spanjë, pas 15 sezonesh në ekipin e parë, ku arriti të fitonte gjithçka. Një mungesë e madhe.
SUPERKUPA NË ARABI – NOTA 6 – Në kohët e përsosmërisë së futbollit, ishte një titull i vogël, por Superkupa e Spanjës e fituar nga Barça e Ksavit në janar 2023 duhet të vlerësohet si trampolinë që u pasua nga titulli në La Liga 2022-23.
TER SHTEGEN DHE LEVANDOVSKI – NOTA 7 – Një sezon i shkëlqyer ai 2022- 23 për portierin gjerman dhe sulmuesin polak. Ter Shtegen fitoi trofeun e tij të parë “Zamora” (portieri më i mirë), duke pësuar 18 gola në 38 ndeshje. Levandovski, me 23 gola në sezonin e tij të parë te Barça, fitoi “Pichichi”-n (golashënuesi më i mirë) e tij të parë.
“TOPI I ARTË” I AITANËS – NOTA 8 – Futbollistja më e mirë në botë është edhe një herë e Barçës. Pas dy trofeve të fituar nga Aleksia Putejas, në vitin 2023 i erdhi radha Aitana Bonmatít, që udhëhoqi Barçën dhe Spanjën.
LA LIGA E KSAVIT – NOTA 9 – Liga 2022-2023 e fituar nga Barça e Ksavi Hernández në një kohë të komplikuar për shkak të situatës ekonomike të klubit kishte një meritë të madhe. Skuadra e Barçës nuk e kishte ngritur trofeun që nga sezoni 2018-19 me Ernesto Valverden në krye. Barça e fitoi bindshëm titullin me 10 pikë përpara Realit të Madridit, katër javë para fundit dhe për më shumë në shtëpinë e Espanjolit.
“CHAMPIONS”-I I FEMRAVE – NOTA 10 – Qershia mbi tortë e sezonit 2022-23 të Barçës për femra ishte Liga e Kampionëve e fituar kundër Volfsburgut (3- 2) në “Philips Stadion” në Eind’hoven. Skuadra e Xhonathan Giráldez mbylli një kompeticion të madh duke fituar Ligën e Kampionëve të dytë në historinë e saj.