Kryetari i Partisë së Lirisë, Ilir Meta, ka reaguar pas vendimit të gjykatës, e cila pranoi kërkesën e SPAK për të lënë në ‘arrest shtëpie’ ish-kryeministrin Sali Berisha.
Meta shprehet se kjo është një vepër direkte e Edi Ramës që ka për qëllim eliminimin e opozitës.
“Vendimi i sotëm i GjKKO është një akt ekstrem i përndjekjes politike të Prof. Dr. Sali Berishës dhe vepër e drejtpërdrejtë e Edi Ramës për eliminimin e opozitës.
Izolimi i paprecedentë i liderit të opozitës është kambanë alarmi për liritë dhe të drejtat e çdo qytetari, për vetë ekzistencën e shtetit të së drejtës, si dhe për pluralizmin politik, që është nga sot më i kërcënuar se kurrë më parë,” shkruan Meta.
