Nga Basir Çollaku
Politika, gjeopolitika, teknologjia, globalizmi, konfliktet kombëtare dhe ndërkombëtare, po prodhojnë gjithnjë e më tepër kriza se sa zgjidhje të tyre. Shqipëria ka rënë nën tufën e një kaosi të mirë organizuar nga përfituesit e tij. Politika dhe diplomacia, kryesisht sunduesit e mëdhenj, kanë gjetur një instrument kontrolli mbi këdo e gjithçka. Drejtësinë. Graali i shenjtë ka ndërruar duar, por jo fuqinë. Të gjithë duan ta kapin atë nga pak, por fitues shpallet kapësi e kontrolluesi i së tërës.
Rama ka mundur ta bëjë në mënyrën më të keqe me një kosto të lartë. Prokurorë e gjyqtarë shesin deklarata pavarësie por jo vendime të tilla. Ne e kemi marrë njëherë më shaka vendosjen e diktaturës në vitin 45, dhe historia po përdor mekanizmat fatkeq të përsëritjes. Zyrtarët e drejtësisë së re kanë hyrë në një hulli të padrejtë, duke konsumuar sjellje sipas orekseve të pushtetit politik larg atij juridik.
Ditë më pare kryetarja e Gjykatës Kushtetuese Holta Zaçaj, doli në një deklaratë politike, duke mos trazuar stomakun e qeverisë. Kjo gjykatë rrëzon çdo kërkesë të opozitës, bën lëmsh referencat e precedentët, duke shërbyer si hipotekë e burimit nga ku kanë marrë detyrën. Sokol Sadushi kreu i Gjykatës së Lartë, pasi përdorën shoqata e militantë për asistencë gjyqësore në pakësimin e mijëra dosjeve të akumuluara, ka sjellë një propozim tjetër partiak, të pahasur gjëkundi në rekordet e drejtësisë nëpër botë. Të kujtojnë propozimet e tij, bisedat në telefonat me aplikacionet Sky e Encrochat, biseda mes pushtetarëve e politikanëve, e zyrtarëve të drejtësisë së të gjitha niveleve, ku ujdisen ortakëri e dakortësi për të mbyllur hesapet. Pavarësisht nëse vrasës e trafikantë kanë bërë batërdinë. Mjafton mos të çalojë peshorja e pagesës financiare dhe përfitimeve ekonomike.
Sadushi solli shpikjen e mosankimimit nga avokatët, pasi humbësit do të gjobiten nga Dhoma e Avokatisë, sepse po humbasin kohë të çmuar për drejtësinë e re, ku keqrekordet janë shtuar. Sadushi do të pengojë drejtësinë, pamundësojë ankimet, duke paragjykuar edhe vendimet, një sinjal se do rrëzohen e gjobat do shtohen, e afatet për Kushtetuese e Strasburg nuk do të arrihen asnjëherë. Kryetari i kësaj Gjykate, e sheh si punë të qëruar gjobitjen e çdo avokati që bën rekurs, për çështje të cilat do të rrëzohen më pas nga kjo gjykatë.
Po për çështje nga ankimimi i të cilave do të fitohet nga kërkuesit, kë propozoni të gjobisni zoti Sadushi?! Gjyqtarët e gjykatës së shkallës paraardhëse vendimi i së cilës është rrëzuar?! Në një rast të mundshëm mund të jetë edhe bashkëshortja e tij gjyqtare në Apel.!!! Po për rekursin, e Prokurorëve, ankimimet e të cilëve mund të rrëzohen nga po kjo gjykatë, a propozon gjoba kryetari i Gjykatës së Lartë?!?? Ky proprozim vjen kur Gjykata e Strasburgut ka shprehur shpesh qëndrime për dhënie të drejtësisë e jo presion ndaj avokatëve. Është një paligjshmëri e dhunshme, e cila po kurdiset të përfshihet në ndryshime të mundshme të Kodit të procedurës. Mendoni se diktatura shtrohet ndryshe??! Janë duke tentuar heqjen e avokatëve, heqjen e mbrojtjes, si mundësi për të konsumuar të drejtën e shqyrtimit në gjithë shkallët e gjyqësorit.
Po dy ditë më herët kreu i Prokurorisë së Posaçme ndër të tjera u shpreh se në disa çështje kishte përcjellë udhëzime detyruese, pa saktësuar nëse ishin administrative, për shkaqe të respektimit ose jo të afateve procedurale nga prokurorët, apo penale. Sepse njëra mund të qëndrojë tjetra vështirë të ketë bazë ligjore, sipas ligjit me të cilin funksionon Prokuroria para dhe pas reformës. Kemi hyrë plot rrezik në Republikën e Unit, e Njëshit në drejtësi, ku KryeNjëshi urdhërues për njëshat mbetet të jetë Edi Rama. Kjo nuk mund të cilësohet shërbim me drejtësi, por vendim me porosi. Njëlloj si ne dosjet e shumta me lëndë të parë telefonat e kriptuar Sky, Encrochat dhe Matrix. Mafia e bandat porosisin shërbimin në drejtësi, paguajnë e marrin çfarë duan dhe mosndëshkimin e përfitojnë të gjithë.
