Lushnja që dikur konsiderohej si “hambari i Shqipërisë”, këtë fundviti gjen në tregje fruta-perime importi.
Nga jashtë vijnë jo vetëm për produktet jo stinore por dhe për prodhime që kultivohen me shumicë në vendin tonë. Shumë tregtarë ankohen së prodhimi u ka mbetur pa shitur sidomos agrumet, kjo për shkak se produktet e importit po “mbysin” prodhimin vendas.
Në një vend të përgjegjshëm, qeveria në fillim të sezonit përcakton “politika” të ndryshme me qëllim mbrojtjen e prodhimit vendas por në Shqipëri ndodh e kundërta pasi kryeministri Edi Rama ka lënë në “mëshirë të fatit” fermerët.
Në kohën kur ish kryeministri Sali Berisha ishte në pushtet, qeveria e tij hartonte politika për të mbrojtur prodhimin vendas ku në disa muaj të caktuar të vitit disa produkte importi kishin një taksë shtesë me qëllim që frutat dhe perimet stinore vendase mos konkurroheshin nga produkteve të importit. Në këtë mënyrë fermerët shisnin produktet e tyre dhe nuk detyroheshin t’i hidhnin në kanal siç ndodh sot për shkak se malli vendas po mbetet pa shitur.
“Produkti jonë, domatja këtu është 70-80 lekë, nëse jashtë vjen e turkut, grekut me 200 lekë dhe e marrin. Preshi, madarinat janë 30-40 lekë. Vjen nga Saranda portokalli i grekut 60 lekë, e jona 40 lekë. Komplet makina pa shitur”, thotë tregtari per mikrofonin e Top Channel.
“Sot skam shitur asnjë arkë. Ju pëlqen më shumë malli i importit”, thotë një tjetër fermer.
“Nuk shihet malli vendas, me sa të dojë ai nuk shitet”, shprehet një tjetër.
“Prodhoj limonë, as me 20 lekë nuk po e shesim dot. Magazinat janë gjithë me import. Malli jonë ja… ky është bio dhe nuk ecën”, tha një tregtare.
Ndërsa fermerët shprehen se malli ynë është cilësor, importuesit tregojnë jashtë kamerave se kërkesa për mall nga jashtë është më e lartë sipas tyre për shkak të cilësisë.
