Vrasja e 26-vjeçares Vanessa Ballan në Itali, nga ish-partneri i saj Bujar Fandaj, vijon të jetë kryefjala e mediave vendase, teksa detaje të reja dalin në dritë.
Mësohet se çifti i kishin dhënë fund lidhjes së tyre dhe se Vanesa kishte filluar një romancë të re, gjë e cila nuk ishte pranuar nga ish-partneri i saj, Bujari, i cili e kërcënonte vazhdimisht se do ta vriste nëse nuk kthehej me të.
40-vjeçari nga Kosova, i cili është aktualisht në burg në Treviso, mësohet se para se të kryente aktin e tmerrshëm, e shantazhonte seksualisht, Vanesën me videot intime që kishin bërë bashkë.
‘Kthehu me mua ose do të nxjerr videot intime’,– shkruhet në mesazhet e tij dërguar Vanesës.
Kujtojmë se Vanessa u vra me tetë plagë me thikë të shkaktuara me një teh 20 centimetrash, njëra prej të cilave goditi zemrën dhe dy mushkëritë; goditje të thella që shkaktuan vdekjen në pak minuta.
Ajo e kishte denoncuar ish-burrin e saj, por nuk ishte marrë asnjë masë nga prokuroria, kjo pasi sipas mediave vendase, prokurorja publike Barbara Sabattini e kishte konsideruar jo urgjente marrjen e masave mbrojtëse pas ankesës.
Vanesa ishte në pritje të fëmijës së dytë.
