Kreu i Partisë Demokratike, Sali Berisha ka deklaruar se do të vijojë aksioni opozitar me misionin e vetëm për të “rrëzuar qeverinë Rama”.
Në dalje nga selia blu, Berisha u bëri thirrje shqiptarëve që të dalin në protestë për të rikthemeluar pluralizmin në vendin tonë.
“A e patë ju sot protestën? Protesta sot është fillimi i përballjes, dhe ju garantoj se ka një vullnet dhe një revoltë të jashtëzakonshme te demokratët. Kështu që prisni sepse kjo parti nuk lufton më për veten e saj, lufton për rithemelimin e pluralizmit politik në Shqipëri.
Nuk ka betejë më epike, nuk ka mision më të madh. Unë u kam deklaruar ju dhe shqiptarëve, epoka e pluralizmit që solli revolucioni demokratik i vitit 90 është mbyllur pa asnjë iluzion. Ndaj dhe kthesa, ndaj dhe janë ftuar shqiptarët të marrin kthesën në mënyrën e re, të rithemelojmë pluralizmin.
Kjo do ndodhë, do apo nuk do Edi Rama dhe makineria e tij e krimit, drogës dhe vjedhjeve. Kjo parti do e përmbushë këtë mision me vendosmëri absolute. E patë, Edi Rama dhe organet e diktaturës, krimit, drogës dhe vjedhjeve do jenë në përballje konstante me demokratët dhe popullin në këmbë për të rikthyer pluralizmin politik dhe vlerat e demokracisë”, tha Berisha.
