Kryeministri Edi Rama ka paralajmëruar këtë të enjte shkarkimin nga detyra të kryebashkiakut ende në detyrë të Himarës Jorgo Goro.
Njoftimin e bën në një postim në rrjetet sociale, duke iu referuar vendimit të fundit të Gjykatës së Posaçme për Fredi Belerin. GJKKO vendosi javën e kaluar të rrëzuar kërkesën e Fredi Belerit për t’u betuar si kryebashkiak i Himarës. Sipas gjykatës, nuk ka një dispozitë ligjore që mund ta lejojë Belerin që të betohet, edhe pse më 14 maj ai fitoi bashkinë Himarë, përballë Jorgo Goros së PS-së.
Në një reagim në “X”, Rama mbështet vendimin e GJKKO-së.
“Mosdhënia e lejes për betim në kushtet e paraburgimit nga ana e Drejtorisë së Përgjithshme të Burgjeve, rezulton përfundimisht një qëndrim korrekt ligjor, ashtu sikundër edhe refuzimi i gjykatës speciale ndaj kërkesës është qartësisht i lexueshëm dhe lehtësisht i kuptueshëm.
Fakti që kryetari i zgjedhur i Himarës mbetet i tillë deri në fund të gjykimit dhe vetëm shpallja me vendim të formës së prerë do të përcaktojë mundësinë e tij për t’u betuar në rast pafajësie apo pamundësinë e tij për të mbetur kryebashkiak në rast fajësie, është po ashtu qartësisht i lexueshëm dhe lehtësisht i kuptueshëm”, shkruan.
Më tej, paralajmëron shkarkimin nga detyra të Jorgo Goros.
“Referimi nga ana e GJKKO e ngërçit që krijohet në vazhdimësinë e përkohshme të detyrës nga ana e kandidatit humbës, përderisa faktikisht kryebashkiaku i zgjedhur mbetet në paraburgim, ndërkohë që kryebashkiaku ende në zyrë nuk e ka legjitimitetin për të drejtuar bashkinë në mungesë të fituesit, e bën qartësisht të lexueshme dhe lehtësisht të kuptueshme nevojën e daljes nga ky ngërç përmes ndërprerjes së vazhdimësisë së qëndrimit në detyrë të kandidatit humbës, bazuar në praktikat më të mira europiane për sigurimin e shërbimeve publike në bashkinë e Himarës”, shprehet.
Sipas tij, “ky vendim i arsyetuar i GJKKO është një konfirmim i padiskutueshëm ligjor i ‘çështjes Beleri’ si një çështje e drejtësisë, assesi e politikës apo kurrsesi e organeve të qeverisë qendrore. Po ashtu arsyetimi i këtij vendimi krijon një premisë pozitive për adresimin e ngërçit të lartpërmendur”.
