Ish-ministri demokrat Genc Pollo e quan dështimin vendimin e një dite më parë të Gjykatës Kushtetuese, që nuk pranoi kërkesën e deputetëve të opozitës, të cilët kërkonin zgjidhjen e konfliktit të kompetencave mes Kuvendit dhe Gjykatës së Posaçme, e cila ka aplikuar më herët masa sigurimi për ligjvënësin dhe njëkohësisht kryetarin e Partisë Demokratike, Sali Berisha.
“Gjykata Kushtetuese dështoi! Ajo nuk përmbushi funksionin bazik të sajin: të qartësojë kufirin e kompetencave mes organeve shtetërore”, shkruan Pollo në një postim në rrjetet sociale.
“Në rastin konkret mes Kuvendit të Republikës dhe Prokurorisë së Posaçme. Arsyeja që paraqiti (1/5 e Deputetëve nuk legjitimohen për kërkesë) është budallalëk me brirë: kush mund t’a vërë në lëvizje Gj.K.? Qeveria apo Kuvendi që dominohen nga e njëjta parti. Pastaj në dekada Gj K. ka pranuar kërkesa të ngjashme nga deputetë për çështje nga më të ndryshmet. Deri ditën e sotme kur moralisht abrogoi vetveten”, shton ai.
