Katër persona janë arrestuar dhe dy të tjerë janë shpallur në kërkim nga policia, që njofton se ka zbuluar një skemë mashtrimi përmes call-cenetr-ave. Personat e arrestuar: Bekim Byberi, 31 vjeç, Jani Janko, 31 vjeç, Klaudio Demiri, 30 vjeç dhe Andi Lleshaj, 34 vjeç, të katërt banues në Tiranë – janë në pozicion drejtues në dy bizneset, ndërsa të shpallurit në kërkim janë administratorët e subjekteve: E.A. dhe A.O.
Sipas bluve, përmes call-ceter-ave mashtroheshin persona nga vende të ndryshme të botës përmes investimeve në bursa fiktive. Në dy call-center-at punonin 29 persona, 10 prej tyre të paregjistruar.
“Nga hetimet rezultoi se këta shtetas, nëpërmjet 2 subjekteve ekonomike call center, në kryeqytet, të cilat ishin regjistruar në mënyrë fiktive, si aktivitete të tjera tregtare, të ligjshme, mashtronin shtetas në kontinente të ndryshme, kryesisht gjatë orëve të natës, që të investonin shuma të konsiderueshme parash, në tregje fiktive. Gjithashtu, nga hetimet dyshohet se të ardhurat që gjeneroheshin nga kjo veprimtari kriminale, pastroheshin nëpërmjet bizneseve të të afërmve të shtetasve të implikuar në këto raste. Nga kontrollet, në të dyja call centerat u gjetën 10 punonjës të paregjistruar, si dhe u sekuestruan në cilësinë e provës materiale: 9000 euro, 82 njësi kompjuterike, 23 celularë, 1 DVR, 2 USB, 50 karta me numra celularësh, të kompanive të huaja, dhe dokumente të tjera që do t’i shërbejnë hetimit”, njofton policia.
Aksioni i koduar “De facto” u krye nga sektori për Hetimin e Krimeve Ekonomiko-Financiare, në Drejtorinë për Hetimin e këtyre krimeve, në DPPSH. Burime zyrtare thanë se hetimi për rastin vijon ende.
