Ka dështuar takimi mes presidentes së Kosovës, Vjosa Osmani dhe kreut të Partisë Aleanca për Ardhmërinë e Kosovës, Ramush Haradinaj, gjatë së cilit pritej të diskutohej për çështjen e asociacionit.
Sipas asaj që raportojnë media kosovare, dështimi i këtij takimi ka ndodhur pasi presidentja Osmani është vonuar dhe këtë gjë e pretendon dhe AAK.
“Dje e kishim një vullnet të mirë për të biseduar me Presidenten Osmani për çështjet me rëndësi për vendin, veçanërisht për draft-statutin e Asociacionit. Kryetari Ramush Haradinaj si dhe Sekretari i Përgjithshëm Muharrem Nitaj ishin në Presidencë në orarin e përcaktuar nga Presidentja Osmani, por fatkeqësisht Presidentja nuk respektoi orarin e caktuar nga vetë ajo dhe për këtë arsye takimi nuk është realizuar”, tha zëdhënësi i AAK, Xhemaili.
Por, nga Presidenca thonë se Haradinaj nuk ka dashur të presë.
“Takimi ishte paraparë të mbahet, por për shkaqe protokollare nuk është realizuar. Z.Haradinaj nuk ka dashur të presë derisa protokolli e ka njoftuar Presidenten për arritjen e tij”, u shpreh këshilltari për media i Presidencës, Bekim Kupina.
