Një përplasje me armë zjarri është regjistruar ditën e sotme në burgun e Peqinit. Burime bëjnë me dije se tre të burgosur janë përplasur mes tyre, ku bëhet fjalë për Sokol Mjacaj, Ilir Xhakja dhe Indrit Shaqja.
Mësohet se i dënuari me burgim të përjetshëm Sokol Mjacaj ka qëlluar me armë zjarri pistoletë ndaj Arben Lleshit dhe Indrit Shaqjas. Ngjarja ka ndodhur në ambientet e ajrimit të burgut, pas vendimit të ministrit të Drejtësisë, Ulsi Manja, i cili firmosi izolimin në regjimin “41 Biss” të të dënuarit Sokol Mjacaj.
Si pasojë e të shtënave me armë ka mbetur i vdekur Arben Lleshi dhe ka mbetur i plagosur në këmbë Indrit Shaqja, i cili mësohet se ndodhet jashtë rrezikut për jetën.
Mbetet e paqartë se si është armatosur Sokol Mjacja brenda qelisë, por dyshohet se pistoleta mund të jetë futur me dron në burgun e Peqinit. Pas ngjarjes, Sokol Mjacaj është izoluar, teksa ngjarja është marrë nën hetim nga Prokuroria e Elbasanit.
Në vendin e ngjarjes mësohet se kanë mbërritur Kryeprokurori i Elbasanit, Kreshnik Ajazi, Drejtori i Përgjithshem i Burgjeve, Drejtori i Përgjithshëm i Policisë së Shtetit, Muhamet Rrumbullaku, Forcat Operacionale të Drejtorisë së Përgjithshme të Burgjeve dhe Forcat RENEA.
Burgu i Peqinit është burg i sigurisë së lartë, ku vuajnë dënimin një numër i lartë të dënuarish për krime të rëndë. Nuk përjashtohet pista që Sokol Mjacaj të jetë paguar nga të tjerë për të kryer vrasjen brenda burgut
Sokol Mjacaj është dënuar me burgim të përjetshëm, pasi ka vrarë dy turistët çekë, Michal Svatos dhe Anna Kusinova, më 3 korrik 2015 në fshatin Prekal të Dukagjinit. Mjacaj i grabiti dy të rinjtë e më pas i ekzekutoi me armë zjarri në automjetin e tyre.
Ndërsa viktima Arben Lleshi ishte dënuar për vrasjen e bashkëkombësit të tij Agim Hoxha në Sauthempton. Ngjarja është shënuar më 10 prillin 2013 kur Arben Lleshi 27 vjeç, i njohur si shpërndarës droge në Angli, dogji të gjallë brenda në makinën e tij Agim Hoxhën 29 vjeç në Sauthempton të Anglisë. Për këtë ngjarje është dënuar me burg edhe vëllai i Lleshit, Afrim Lleshi, i cili ka pranuar para gjykatës se ka bashkëpunuar në shfarosjen e trupit të viktimës. Shkaku i vërtet i vrasjes nuk është asnjëherë i ditur nga vëllezërit.
Indrit Shaqe është arrestuar nga Interpoli në Barcelonë në vitin 2014 pasi akuzohet për grabitje me pasojë vdekjen e dy të moshuarave, Gjinovefa dhe Elsa Vava, më 2 shtator të atij viti. Shaqja ishte shpallur në kërkim ndërkombëtar pasi ishte larguar menjëherë pas ekzekutimit të dy kunatave pasi kishte grabitur 400 mijë lekë dhe bizhuteritë në banesën dykatëshe të kunatave Vava.
