Megjithëse ende nuk ka filluar seanca plenare, jashtë ambienteve të Kuvendit ka pasur një përplasje fizike mes deputetëve të Partisë Demokratike dhe Gardës së Republikës të cilët kanë marrë “urdhër” ekstrem nga Lindita Nikolla.
Deputetët demokratë Flamur Noka, Edmond Spaho, Dashnor Sula dhe disa deputetë të tjerë të opozitës janë përplasur me forcat e Gardës të cilët kanë vendosur gardh në hyrje të Kuvendit.
Megjithëse ka kaluar ora 10:00, ende nuk ka filluar seanca plenare për shkak se Garda ka bërë ‘gardh’ dhe për pasojë as deputetët socialiste dhe ministrat nuk futen dot në ambientet e Kuvendit.
Deputeti Flamur Noka, ndonëse është i përjashtuar nga seancat plenare për 10 ditë, ai shprehet se nuk e njeh vendimin e marrë nga Sekretariati i Etikës.
“E ruajnë godinën, a thua se Sulltan Murati ka zbritur këtu dhe ruan Kështjellën e Lindës. A ka demokraci këtu? Prej kujt e ruajnë Parlamentin! Nuk jam i përjashtuar, nuk respektoj asnjë vendim të Lindës dhe të kamikazëve të Ramës. Nuk është hera e parë kjo gjë.”, tha ai.
