Tirana-Vllaznia është ndeshja më e rëndësishme e javës së 17-të në Superiore dhe si rrjedhojë kuptohet që e gjithë vëmendja e opinionit sportiv do të jetë e përqendruar aty, te “klasikja” e futbollit shqiptar.
Por ndërkohë, ndonëse tifozëritë e të dyja ekipeve kanë pasur dëshirë që kjo ndeshje të luhej në një stadium si “Air Albania”, në fakt klubi bardheblu e ka zgjedhur ta luajë në “Selman Stërmasi”.
Për këtë arsye, takimi sipas Sektorit të Garave pranë Federatës Shqiptare të Futbollit është caktuar të luhet ditën e diel në orën 13.30 në këtë stadium, duke mos realizuar dëshirat e dy tifozërive. Edhe vetë klubi Vllaznia e ka publikuar sot në faqen e tij promon e kësaj ndeshje me këtë destinacion.
Duket se edhe pas ngjarjeve të fundit në derbin me Partizanin, ku klubi i Tiranës mori një ndëshkim të rëndë financiar nga Federata, nuk ka dëshirë më që t’i luajë ndeshjet në stadiumin kombëtar dhe prandaj ka zgjedhur “Selman Stërmasin” për ndeshjen e radhës ndaj Vllaznisë. Megjithatë vendimi përfundimtar do të merret ditën e mërkurë.