Policia e Tiranës ka reaguar në lidhje me tentativën e grabitjes nën kërcënimin e armës së një banese në fshatin Prush, ku pati dhe shkëmbim zjarri mes efektivëve dhe grabitësve.
Sipas bluve të kryeqytetit, ngjarja ka ndodhur rreth orës 19:13, ku tre persona të armatosur janë futur në banesën e shtetasit Gim Hima për të grabitur dhe kanë qëlluar nga Policisë, në momentin që i është afruar banesës.
“Më datë 09.12.2023, rreth orës 19:13, në fshatin Prush, përballë ambulancës, në banesën e shtetasit G. H., janë futur disa persona, të armatosur. Me marrjen e njoftimit shërbimet e Policisë kanë shkuar menjëherë në vendngjarje, dhe në momentin që janë afruar afër banesës, tre personat e armatosur, kanë qëlluar me armë ndaj tyre. Policia është përgjigjur me armë ndaj tyre.” – thuhet në njoftim.
Gjithashtu, bëhet me dije se Policia e Tiranës, RENEA, Forcat Kombëtare të Sigurisë, po vijojnë krehjen e zonës dhe kanë ngritur pika kontrolli në të gjitha akset kryesore dhe hyrje-daljet e kryeqytetit për identifikimin dhe kapjen e autorëve të dyshuar.
Burime bëjnë me dije se kanë qenë bashkëfshatarët ata të cilët kanë njoftuar Policinë dhe ka parandaluar grabitjen. Mësohet se tre grabitësit kanë qenë të armatosur me armë zjarri kallashnikov dhe janë larguar me një automjet tip ‘”Audi” ngjyrë të bardhë me targa “AA943SG” në drejtim të Liqenit të Thatë. Targa e automjetit rezulton e vjedhur.
