Për politologun Ilir Kalemaj, Kongresi i PS-së nuk prodhoi asnjë lajm dhe se ishte i pavlerë nga pikëpamja e interesit publik.
I ftuar në studion e lajmeve në MCN Tv, Kalemaj tha se në këtë Kongres nuk pati asnjë lloj platforme të re ideore, ideologjike të PS-së.
“Nuk prodhoi asnjë lajm në kuptimin që nuk patëm asnjë ndryshim qeveritar, as cilësor as sasior . Nuk patëm asnjë platformë të re ideore, ideologjike të PS-së. Nuk ishte as vendi, as Kuvendi për faktin që nuk kemi një fushatë zgjedhore, nuk kemi zgjedhje në horizont dhe për këtë arsye ishte një Kongres i pavlerë nga pikëpamja e interesit publik. Nga pikëpamja e interesit politik të Ramës, çështja e strukturave, çështja e beniaminëve të tij, mund të vlejë brenda PS-së, është në pikëpyetje edhe kjo”, tha Kalemaj.
Më tej, Kalemaj u shpreh se miti “Rama po i lëshon të tijët”, nuk është i vërtetë, pasi ai po i mbron ata nëpërmjet formave të ndryshme.
“Rama dje tha se nuk do të kemi republikë të prokurorëve, të gjyqtarëve, kjo ishte shigjetim në fakt ndaj punës që po bën drejtësia për momentin, ndërkohë që ka dhe spekulime dhe akuza nga opozita dhe jo vetëm që Rama ka nën kontroll sistemin e drejtësisë. Janë dy të vërteta të kithëta në pamje të parë, por unë mendoj se janë edhe komplomentare. Nga njëra anë Rama nuk mund të lejojë që gjërat të dalin jashtë kontrollit të tij dhe nga ana tjetër, e aq më pak sistemi i drejtësisë Ka teza që u sakrifikua Ahmetaj për Ramën, Tushe për Veliajn dhe Rrjepaj dhe Rrapaj për të shpëtuar Ilir Beqajn.
Po pa u futur në konspiracionin e këtyre spekulimeve ajo që ne dimë apo vlerësojmë në mënyrë të pavarur dhe paanshme është që Rama përkundër mitit që “i ka lëshuar të tijët”, ai nuk i ka lëshuar aspak, madje po i mbron duke i ofruar kopertura politike sa herë të mundet, kurdo herë që të mundet. Ahmetaj kishte kohë që i kishte prishur marrëdhënien me Ramën, ishte shkarkuar nga funksionet e tij, politike partiake brenda PS-së dhe u la i lirë të largohej jashtë vendit me sekretet e tij. Pjesën tjetër e ka mbrojtur, ka mbrojtur Beqajn ,Veliajn dhe eksponentë të tjerë, të cilët ose i ka mbrojtur drejtpërdrejtë ose i ka dhënë kohë dhe mundësi që të kenë mjaftueshëm përgatitje për t’i shpëtuar tentakulave të drejtësisë, ose i ka veshur me mburojë që në momentin e parë nëpërmjet VKM-ve dhe akteve të tjera kolektive”, tha Kalemaj.
