Kina vuri në përdorim sot termocentralin e parë bërthamor në botë, i ashtuquajturi gjenerata e katërt, një përparim të madh për gjigantin aziatik në garën për reaktorët e së ardhmes.
Termocentrali bërthamor Xidao Bei, i vendosur në Shandong, në pjesën lindore të vendit, furnizohet me energji nga dy reaktorë me temperaturë të lartë që ftohen me gaz dhe jo me ujë nën presion, shkruajnë mediat e huaja.
“Operacioni komercial i stacionit të Gjirit Xidao ka filluar zyrtarisht”, njoftoi sot Agjencia zyrtare e Lajmeve Xinhua. Kjo është premiera botërore e këtij lloji reaktori, sipas agjencisë kineze të lajmeve. Reaktorët tradicionalë lejojnë që energjia elektrike të prodhohet nga energjia bërthamore. Por këto modele të avancuara (të ashtuquajturat reaktorë të vegjël modularë ose SMR) mund të përdoren edhe për aplikime të tjera, si kryesisht për ngrohje, shkripëzimin e ujit të detit apo edhe avull për nevoja industriale.
Kina, e cila po kërkon të heqë qafe qymyrin për të fuqizuar termocentralet e saj, është në ballë të garës për reaktorë të rinj. Vendi kërkon gjithashtu të reduktojë varësinë e tij nga teknologjitë e huaja, nisur nga tensionet me vendet perëndimore.
Më shumë se 90 për qind e pajisjeve në stacionin Xidao Bei janë të prodhuara nga Kina, citohet të ketë thënë me kënaqësi një nga zyrtarët e projektit, Zhang Yanshu, nga Xinhua. Ndërtimi i uzinës filloi në vitin 2012.
Një SMR e parë u lidh me rrjetin elektrik në dhjetor 2021. Kapaciteti gjenerues i Gjirit Xidao është 200 Më, sipas mediave kineze. Sipas mbështetësve të tyre, reaktorët SMR mund të luajnë një rol qendror në dekarbonizimin dhe tranzicionin e energjisë, falë arkitekturës së tyre kompakte dhe të thjeshtuar, një dizajni modular që redukton koston dhe kohën e prodhimit dhe shpejtësinë e tyre. Sipas Agjencisë Ndërkombëtare të Energjisë Atomike (IAEA), më shumë se 80 projekte janë në zhvillim e sipër në 18 vende.
