Pas Tiranës, edhe Skënderbeu me Partizanin e kanë siguruar matematikisht kualifikimin në gjysmëfinalet e Kupës së Shqipërisë në volejboll për femra, kompeticion që të shtunën ka kompletuar ndeshjet e ditës së katërt të fazës së grupeve.
Në Grupin A, Skënderbeu vijon të mos njohë rivale, duke regjistruar vetëm fitore të pastra.
Për korçaret e Orlando Kojës ishte një formalitet suksesi ndaj Lushnjës në transfertën e Farkës. Skënderbeut i mjaftuan vetëm 65 minuta lojë për ti mbyllur llogaritë me rezultatin 3-0, duke i fituar setet thellë përkatësisht 7-25, 11-25 dhe 16-25.
Në ndeshjen tjetër të Grupit A, Pogradeci mundi Barletin me rezultatin 3-2 në pallatin e sportit “Tamara Nikolla” në Korçë. Një ndeshje që dhuroi rivalitet të lartë në parket dhe zgjati 2 orë e 4 minuta.
Pogradecaret, me 3 lojtare të huaja në përbërje, u treguan më të sakta, duke marrë një sukses me vlera përballë skuadrës universitare. Pogradeci e nisi më mirë ndeshjen, duke marrë epërsinë e dyfishtë në sete, teksa fitoi dy fraksionet e para të lojës 25-20 dhe 25-23.
Por Barleti arriti të reagonte, teksa bëri më mirë në dy setet e radhës, të cilat i mori në shifrat 15-25 dhe 23-25, duke e çuar sfidën me set final. Por ne seti i pestë foli për pogradecaret e Mimoza Shahut, të cilat fituan bindshëm 15-8, duke dalë më sukses 2-pikësh nga kjo përballje.
Për sa u përket takimeve të Grupit B, asnjë problem për Partizanin në transfertën e Durrësit kundër Teutës. Kampionet e Shqipërisë e dominuan tërësisht sfidën ndaj bregdetareve, duke i mbyllur llogaritë për 53 minuta. Diferencat në parket ishin shumë të mëdha, të cilat i pasqyrojnë qartë edhe rezultatet e seteve, 12-25, 12-25 dhe 9-25 në favor të të kuqeve të Amarilda Prengës.
Në ndeshjen tjetër të Grupit B, Tirana likuidoi të premten Vllazninë në Shkodër me rezultatin 0-3 (16-25, 16-25, 14-25), duke u bërë skuadra e parë e kualifikuar zyrtarisht për në fazën gjysmëfinale.
