Është zbardhur dëshmia e dhënë për grupin hetimor e 70-vjeçarit Maliq Marku, i cili pasditen e djeshme vrau me armë zjarri fqinjin e tij, Shefqet Hasa, rreth 55 vjeç dhe plagosi fqinjin tjetër, Besim Keça, rreth 50 vjeç, ku shkaku i konfliktit mes tyre ishte kanali i ujërave të zeza pranë banesave të tyre.
Mësohet se ai ka shfaqur shenja pendimi për krimin e kryer, teksa pretendon se i ka qëlluar fqinjët e tij për vetëmbrojtje. Maliq Marku ka konfirmuar konliktin që ka patur me viktimën dhe të plagosurin për kanalizimet e ujërave të zeza. Ai ka thënë se ka shkuar për t’u sqaruar, por situata doli nga kontrolli dhe në gjaknxehtësi e sipër ka marrë armën në shtëpi dhe ka qëlluar ndaj tyre.
“Gjithçka ndodhi shumë shpejt, ata të dy më kanë ofenduar gjatë ditës së djeshme”, – mësohet se ka deklaruar Maliq Marku para grupit hetimor.
Banorët e Laknasit, pak kohë më parë kishin mbledhur lekët për ta ndërtuar vetë kanalizimet e ujërave të zeza, ndërkohë që Maliq Marku ndodhej në Angli dhe nuk kishte kontribuar. Ai ishte kthyer në atdhe rreth një javë më parë dhe kishte shkuar tek ujësjellësi për të lidhur edhe banesën e tij me kanalin e ujërave të zeza.
Ujësjellësi ka bërë piketimin, ndërsa dy fqinjët kanë shkuar për t’i thënë që nuk do ta ndërtonte. Gjatë debatit, në gjaknxehtësi e sipër, 70-vjeçari ka shkuar në banesën e tij ka marrë pistoletën dhe ka shkuar duke qëlluar ndaj fqinjëve duke e lënë të vdekur në derë të shtëpisë së tij njërin prej tyre.
Shefqet Hasa i cili ndërroi jetë ka marrë katër plumba, ndërsa Besim Keça i cili mbeti i plagosurka marrë dy plumba, 1 në bark e 1 në këmbë. Në momentin e të shtënave, në afërsi të lagjes ka qenë polici i zonës i cili pasi ka dëgjuar krismat është afruar dhe ka gjetur personin e plagosur duke vrapuar, të cilin e ka marrë me makinë. Më tutje ka gjetur të vdekur Shefqet Hasën.
Pas krimit autori Maliq Marku ka hyrë në banesë por kur kanë shkuar efektivët për ta arrestuar fillimisht ka bërë rezistencë për t’u dorëzuar, por pas negociatave ka hedhur armën në bahçe dhe më pas i kanë vënë prangat.
