Liridona Murseli, gruaja e Naim Murselit – ish-këshilltar i Behgjet Pacollit gjatë kohës kur ky i fundit ishte në krye të Presidencës së Kosovës – mbeti e vrarë me armë zjarri mbrëmjen e së Mërkurës në Prishtinë.
Ngjarja u raportua si nga autoritetet ashtu edhe mediat si një grabitje e shkuar keq, nisur edhe nga dëshmia e Naim Murselit. Autoritetet bënë me dije fill pas krimit se bashkëshortja 33-vjeçare e Naim Murselit mori një plumb që e la të vdekur në vend kur familja, çifti dhe dy fëmijët u përballën me grabitësit.
Në rindërtimin e versionit paraprak të ngjarjes, baza ishte dëshmia e bashkëshortit të viktimës.
Në deklaratën për hetuesit, ai rrëfeu se ndodhej bashkë me gruan dhe fëmijët në makinë, kur papritmas iu kanë zënë pritë dy grabitës të armatosur, me një automjet tip BMW me targa të huaja.
Murseli kishte deklaruar se kur u përballën me grabitësit, ai i mori fëmijët për t’i larguar nga vendi i ngjarjes, ndërsa bashkëshortja u qëllua për vdekje nga keqbërësit.
Teksa Liridona Murseli u varros sot në Cërmjan të Gjakovës, pista e hetimeve është përmbysur. Policia njofton se ka arrestuar dy persona të dyshuar të cilët lidhen me vrasjen dhe operacioni është duke vazhduar me bastisjen e dy lokacioneve në Gjakovë.
Një prej të arrestuarve është pikërisht bashkëshorte i viktimës dhe tjetri dyshohet të jetë ekzekutoi që shkrepi armën për të ekzekutuar të renë me urdhër të të parit dhe në këmbim të një shpërblimi monetar.
“Me datën 29.11.2023, rreth orës 20:20, kemi pranuar informatën për të shtëna me armë në rrugën “Dalip Alshiqi” në Prishtinë. Policia si dhe mjekët emergjent, menjëherë kanë dalë në vendin e ngjarjes, ku në një veturë kanë hasë një person pa shenja jete. Vdekjen e viktimës (femër) e ka konstatuar ekipi mjekësor në vendin e ngjarjes. Mbështetur në informacionet e para, dyshohet se bëhet fjalë për vrasje me armë zjarri. Policia në koordinim me prokurorinë, ka nisur hetim dhe ndërmarrjen e të gjitha veprimeve hetimore dhe të ekzaminimit, që do të ndihmonin hetimin e ngjarjes si dhe sqarimin e plotë të rastit. Pas përfundimit të ekzaminimit të vendit të ngjarjes, janë ndërmarrë veprimeve intensive hetimore të cilat kanë rezultuar në arrestimin e dy personave të dyshuar lidhur me rastin e sipër shënuar”, njoftoi policia.
Mediat në Kosovë sqaruan se njëri prej të arrestuarve është bashkëshorti i 33-vjeçares së ndjerë, i cili dyshohet se pagoi për të vrarë të shoqen.
Ndërsa i arrestuari tjetër raportohet se ka pranuar para prokurores së çështjes se është pikërisht Naim Murseli ai që e ka paguar ta kryejë vrasjen.
Sipas mediave të Kosovës, ai është Granit Plava dhe ka rrëfyer se ka marrë nga Naim Murseli shumën prej 30 mijë euro për të kryer vrasjen.
Të dy akuzohen nga autoritetet për vrasje në bashkëpunim dhe fshehjen e krimit duke e inskenuar si grabitje.
Lexo edhe: Vrasja në Prishtinë, në pranga dhe një efektiv policie
