Nga Boldnews.al
Më datë 29 nëntor, Bashkia e Tiranës organizoi “natën e bardhë”, një traditë komuniste që është futur në kohën kur Edi Rama mori drejtimin e kryeqytetit. Pas ndërprerjes disa vjeçare, tradita e Enver Hoxhës po pasohet nga Lali Eri, i cili vit për vit shpenzon qindra mijëra euro për këto ahengje të kota, që veçse janë vitrinë propagandistikë dhe jo aktivitete të mirëfillta kulturore. Madje, këto para’ shkojnë për artistë/e që kanë lidhje me botën e krimit, apo edhe pastrojnë paratë e tyre. Vitin e kaluar, Veliaj e bëri tenderin në fillim të vitit, duke përdorur plot 1 milionë euro për fushatën. Çikërrimat i përdori për ahengjet e fundvitit, pasi zgjedhjet i morën pjesën më të madhe të parave. Këtë vit, është më i qetë, pasi ka mandatin e fundit dhe po “shijon” këto vite, duke bërë qoka dhe duke shpërndarë para’ te njerëzit dhe firmat e preferuara, me shpresën se një ditë ky “investim” do t’i kthehet pas.
Dokumentet e mësipërme janë tenderët e Bashkisë së Tiranës, që ka hapur “thesin” për eventet. Në fakt, një event i tillë u realizua disa javë më parë, ndërkohë që bashkia ka gati edhe një listë tjetër. Sipas dokumenteve që disponon redaksia e BoldNews.al, Lali Eri ka hapur procedurën e prokurimit “blerje shërbimi për aktivitete të ndryshme për Bashkinë Tiranë”. Fondi limit i kësaj procedure është plot 50.000.000 lekë, ose mbi 500 mijë euro. Bëhet fjalë për “shërbime të organizimit të eventeve” dhe “shërbime të organizimit të eventeve kulturore”.
Një nga këto evente ishte edhe “Nata e Bardhë” ku artisja kryesore ishte këngëtarja Elvana Gjata. Emri i kësaj të fundit ka dalë në përgjimet e një grupi që u godit nga SPAK, ndërsa një nga personat e kërkuar Ervin Mata udhëzonte disa bashkëpunëtorë që “po i kaloj paratë nga Elvana”. Megjithatë, kjo s’e ka penguar artisten që të vijojë koncertet duke marrë para’ edhe nga zyrat e shtetit, siç është rasti nga Bashkia e Tiranës. Ka dyshime të mëdha se pas artistes është vetë Veliaj, i cili po mundohet të pastrojë paratë e grupeve kriminale me ato të nxjerra nga buxheti i shtetit.
Ndërkohë, në të njëjtën kohë, Bashkia e Tiranës ka hapur një tjetër procedurë tenderuese. Bëhet fjalë për tenderin me objekt “artikuj të ndryshëm për evente”. Kësaj herë, tenderi është bërë nga Ndërmarrja e Dekorit dhe Eventeve Tiranë, teksa fondi limit i kësaj procedure është 8.000.000 lekë. Mësohet se kërkohen artikuj të ndryshëm. Pra vetëm me dy duar, Veliaj po shpenzon plot 600 mijë euro për këto eventet.
Në muajin korrik të vitit të kaluar, Bashkia e Tiranës hapi një super tender për “evente”. Synimi ishte që këto para’ të përdoreshin para fushatës dhe zgjedhjeve të prillit të vitit 2023. Në atë kohë objekti i tenderit ishte “blerje shërbimi për aktivitete të ndryshme për Bashkinë Tiranë”. Ndërsa fondi limit 83.333.175 lekë pa TVSH, ose me TVSH rreth 1 milionë USD.
Në dokumentet e këtij tenderi, Bashkia e Tiranës shkruante se “këto aktivitete do të shërbejnë për promovimin e qytetit, atraksionet turistike, vlerave kulturore të qytetit, punëve të kryera nga Bashkia e Tiranës dhe forcimin e marrëdhënieve sociale, kulturore, ekonomike dhe politike”. Por në fakt promovuan Lali Erin, në vitin zgjedhor!
