41 persona janë arrestuar në Francë me dyshimin se ishin të lidhur me një sekt ndërkombëtar të akuzuar për akte perverse, pornografi, trafik njerëzish dhe përdhinim, nën maskën e praktikimit të jogës.
Të arrestuarit përfshijnë Gregorian Bivolaru, 71 vjeç, gurunë rumun dhe themeluesi i kësaj lëvizjeje të diskutueshme ndërkombëtare të yogës, tha burimi pranë hetimit, duke shtuar se të tjerë të dyshuar, figura të rëndësishme të sektit u arrestuan gjithashtu në Francë.
Sipas mediave të huaja, lëvizja Misa, e cila u shndërrua në Atman kur u zgjerua jashtë Rumanisë, mësoi jogën, me synimin që të “bindë” viktimat për të pranuar marrëdhënie seksuale përmes teknikave të manipulimit mendor që synojnë të heqin çdo koncept pëlqimi.
Ky sekt i nxiti viktimat femra që të pranojnë marrëdhënie seksuale me drejtuesin e organizatës dhe të angazhohen në praktika pornografike për para në Francë dhe jashtë saj.
Lëvizja për Integrim Shpirtëror ‘Misa’, siç quhet ndryshe, ka shumë shkolla joga dhe degë të tjera. Drejtësia franceze filloi një ekzaminim paraprak në korrik 2023, për shpërdorim detyre, rrëmbim në bandë, përdhunim dhe trafik njerëzish. Në fund të korrikut 2022, Misioni Ndërministror për Vigjilencë dhe Luftimin e Devijimeve Sektare i kishte dërguar një raport gjyqësorit pasi ishte informuar nga Shoqata për të Drejtat e Njeriut për 12 ankesa të anëtarëve të lëvizjes Misa, sqaroi një burim gjyqësor.
Arrestimet ndodhën në rajonin e Parisit dhe në Francën jugperëndimore. Në këtë operacion madhor, i cili koordinohet nga Zyra Qendrore për shuarjen e dhunës ndaj personave, morën pjesë rreth 175 punonjës policie. Gjatë arrestimeve janë liruar 26 gra që ishin nën kontrollin e lëvizjes.
