Ndeshja e femrave për Kategorinë Superiore, Tirana-Vllaznia ka degjeneruar në dhunë, ku nuk kanë munguar konfrontimet fizike mes kampeve të të dy klubeve.
Klubi i Tiranës përmes faqes zyrtare në rrjetet sociale ka bërë një reagim në lidhje me situatën ku thuhet se drejtuesit e klubit të Vllaznisë për femra kanë ushtruar dhunë fizike ndaj drejtoreshës së klubit Edonisa Aliaj, dhe dy futbollisteve, Delvina Dyrmishi dhe Flondra Behrami.
Klubi bardheblu i quan këto akte si barbare dhe presin zbardhjen e çështjes nga organet kompetente.
Ja reagimi i klubit bardheblu:
“Ditën e sotme ishte planifikuar të luhej ndeshja KF Tirana Femra – KF Vllaznia Femra, në kompleksin “Skënder Halili”. Në këtë takim, klubi shkodran nuk ka lejuar që ndeshja të luhet, duke dhënë shembullin më të keq, në një vend ku futbolli i femrave po zhvillohet dhe për më tepër që dy skuadrat ishin duke zhvilluar kampionat me pikë të plota dhe duke ndarë vendin e parë.
Në minutën e 22-të ndeshja është ndërprerë, pasi skuadra kundërshtare ka reaguar ndaj pankinës sonë, fillimisht duke sharë e duke fyer, e më pas duke kaluar edhe në dhunë fizike.
Situata ka eskaluar, ku drejtuesit e Vllaznisë Femra, janë larguar nga pankina e tyre dhe kanë ardhur në pankinën e skuadrës së Tiranës dhe kanë nisur të shfaqin akte të tmerrshme dhune e të godasin stafin teknik, drejtuesit e klubit të Tiranës Femra si edhe futbollistet.
Klubi i Vllaznisë Femra ka dhunuar barbarisht drejtoreshën e klubit të Tiranës, Edonisa Aliaj, portieren Delvina Dyrmishi dhe futbollisten Flondra Behrami.
Dhuna ndaj grave edhe vajzave është një shkelje e përhapur e të drejtave të njeriut dhe një problem global i shëndetit publik me përmasa epidemike.
Ne si klub, presim zbardhjen e kësaj çështjeje nga organet kompetente dhe jemi të gatshëm të bashkëpunojmë deri sa ngjarja të zbardhet plotësisht e aktorët që po shkatërrojnë futbollin “Fair Play”, të marrin dënimin e merituar.
Asnjë justifikim për dhunën ndaj vajzave dhe grave! Asnjë justifikim për dhunën në sport!
ZYRA PËR SHTYP
KF TIRANA”
