Një sherr që ka degraduar në përdorimin e armëve ka ndodhur mesditën e kësaj të enjte në Vorë.
Për shkak të një konflikti për motive të dobëta, dy vëllezër njëri prej tyre oficer ushtrie janë konfliktuar me një person tjetër.
Si pasojë kanë mbetur të plagosur dy prej tyre, njëri me thikë dhe tjetri me armë zjarri. Ka qënë shtetasi E.H 34-vjeç ai i cili ka plagosur fillimisht shtetasin K.M 24-vjeç me thikë në krah dhe më pas vëllai i këtij të fundit, oficer ushtrie, ka qëlluar me armë zjarri drejt 34-vjeçarit.
Të plagosurit janë dërguar në spital, ndërsa është shoqëruar në polici oficeri i ushtrisë.
“Sot rreth orës 12:20, në Vorë, shtetasi E. H., 34 vjeç, ka plagosur me thikë në krah shtetasin K. M., 24 vjeç, banues në Vorë, pasagjer në automjetin me drejtues shtetasin E. M., 27 vjeç, (vëllezër).
Në këto momente, drejtuesi i mjetit, shtetasi E. M., (oficer ushtrie), ka nxjerrë armën e shërbimit dhe ka plagosur shtetasin E. H.
Të dy të dëmtuarit janë shoqëruar në spital, për ndihmë mjekësore, ndërsa shtetasi E. M., është vetëdorëzuar në Polici, së bashku me armën e shërbimit”,- njofton Policia.
Grupi hetimor po punon për sqarimin e rrethanave të ngjarjes.
