Kreu i Grupit Parlamentar të Partisë Demokratike, Gazment Bardhi ka bërë me dije ditën e sotme përmbajtjen e letrës së dërguar trupit diplomatik, veçanërisht Ambasadës së SHBA-ve në Tiranë.
Bardhi për A2 CNN tha se letra ishte informuese për situatën në vend dhe përtej kësaj ka theksuar se ndërkombëtarët duhet të dinë të vërtetën e “shtypjes që po tenton të bëj mazhoranca”.
Nga ana tjetër Bardhi tha se vazhdimisht ka përkrahur dialogun me shumicën qeverisëse, ku përmendi dhe rastin e Komisioneve Hetimore që ka pritur nga Çuçi dhe Nikolla sugjerime, por ata sipas tij kanë refuzuar.
“Absolutisht në çdo vend normal dialogu ndërpartiak është më normalja që mund të ndodhte. Nëse hapni proces-verbalet ku rrëzohen Komisionet Hetimore, i kam kërkuar kolegut tim Çuçi dhe Nikollës të bënin çdo propozim për formulimin e objekteve hetimore. Ne i kemi dërguar jo vetëm delegacionit europian letrën, por të gjithë trupit diplomatik në vend. I kam informuar për situatën në vend. Në vend që të ketë një reflektim nga mazhoranca po shtohen shtypjet ndaj opozitës dhe gjetëm 20 punëtor të Gardës të cilët donin të ushtronin kontroll fizik, që nuk lejohet me ligj. Kemi hyrë në sallën e parlamenti që ne e kishim paralajmëruar, edhe aty pamë Gardën që rrethoi Opozitën.”-tha Bardhi.
