Kryetari i PS-së, Sali Berisha paralajmëroi protesta së shpejti. Në një deklaratë nga Kuvendi transmetuar në faqet e tij në rrjetet sociale, Berisha u shpreh se po afron dita kur shqiptarët do hidhen në një protestë pa kthim kundër qeverisë Rama, që ai e quan “regjim”.
“Këtu mbrapa meje janë deputetë socialistë. Po pse i mbani këta gardistë, po ju pyes unë ju? Keni kaq shumë frikë nga opozita? Opozita këtu është në mosbindje civile, po nuk ka punë me ju, të gjithë problemin e ka me Edi Ramën. Shikoni, katër gardistë kanë rrethuar Pastorin, i cili ka hequr Biblën dhe ka marrë Manifestin. Kjo është salla në parlament në ditën më solemne, kur duhet të miratohet buxheti, por këta kanë tmerr nga buxheti. Se ky është buxheti i vjedhjes më të madhe në historinë e vendit. Në këtë buxhet, mbi 400 milionë janë parashikuar për portin e ri, sepse Edi Rama përvetëson me arabin e tij, me klanet e drogës, me Amant Josifin e Olsi Rams, 1.4 milionë metër katrorë tokë publike në Portin e Durrësit. Ndërkohë, përveçse pasurisë shumë miliardëshe që krijon aty për klanin e tij mafioz, ai shpenzon 400 milionë euro këtë vit për portin e ri në Porto Romano”, tha Berisha.
“Edi Rama ka vendosur në buxhetin e ri, gjobat më të mëdha. Ai rrit me 23 përqind taksat për profesionet e lira, taksa që i paguani ju të gjithë nga xhepi, sepse ata për mbijetesë do rrisin tarifat ndaj jush. Mbi 138 milionë shkojnë për koncesionet dhe PPP-të e tij, ndërkohë që vetëm 10 milionë janë lënë për dëmshpërblimin e të përndjekurve politikë. 138 milionë janë për djegësat, sterilizimin, check-up dhe koncesionet e tjera në varësi direkte të Edi Ramës. Rëndësi jetike ka që ne të vazhdojmë këtë betejë pa kthim, të bindur se po afron dita dhe momenti kur shqiptarët do hidhen në një protestë pa kthim ndaj këtij regjimi, që moral ka vjedhjen, mashtrimin, kodin e mafies, shkelmimin e ligjit”, shtoi ai.
