Ishte planifikuar që të mbërrinte mbrëmjen e djeshme rreth orës, 22:00, por vetëm mëngjesin e kësaj të enjte ka mbërritur në aeroportin e Rinasit, Behar Bajri, i cili u ekstradua nga Franca. Shkak u bënë arsyet e sigurisë për të mos fluturuar me një avion komercial me pasagjerë civilë, por u soll nga Parisi mëngjesin e sotëm me fluturim me charter.
Policia e Shtetit ka publikuar pamjet e mbërritjes së tij në aeroportin e Rinasit, siç shihet, në masat të rrepta sigurie. 43-vjeçari Behar Bajri, i njohur edhe me mbiemrin Brajoviq, ishte shpallur në kërkim ndërkombëtar në kuadër të operacionit të SPAK, “Metamorfoza”, i zhvilluar në muajin gusht.
GJKKO ka caktuar ndaj tij masën e sigurisë “Arrest në burg”, për veprat penale “Vrasja me paramendim”, kryer në formë të veçantë të bashkëpunimit, atë të grupit të strukturuar kriminal, “Mbajtja pa leje dhe prodhimi i armëve, armëve shpërthyese dhe municionit”, “Grupi i strukturuar kriminal”, “Kryerja e veprave penale nga organizata kriminale ose grupi i strukturuar kriminal”, “Sigurimi i kushteve dhe i mjeteve materiale për të kryer vrasje”, kryer në formë të veçantë të bashkëpunimit, atë të grupit të strukturuar kriminal, “Pjesëmarrja në grup të strukturuar kriminal” dhe “Korrupsioni aktiv i gjyqtarit, prokurorit dhe i funksionarëve të tjerë të drejtësisë, kryer në bashkëpunim”.
“Shtetasi B. B. dyshohet se në bashkëpunim me shtetas të tjerë ka vrarë shtetasin Gj. B.(N.), më datë 09.08.2020, në Shkodër. Gjithashtu dyshohet se ka organizuar dhe koordinuar bashkëpunëtorët e tij, iu ka dhënë informacione mbi vendndodhjen e kundërshtarëve, për të organizon prita, me qëllim vrasjen e tyre. Nga hetimet e kryera nga Prokuroria e Posaçme kundër Korrupsionit dhe Krimit të Organizuar ka dyshime të arsyeshme të bazuara në prova se shtetasi B. B., kundrejt ofrimit të shumave monetare funksionarëve të drejtësisë, ka bërë të mundur lirimin nga burgu, para kohe.” – thuhet në njoftimin e Policisë.
Behar Bajri ishte shpallur në kërkim ndërkombëtar, në kuadër të operacionit “Metamorfoza”, grup të pandehurish që akuzohen për vrasje, grup kriminal dhe korrupsion. Hetimet nisën në vitin 2019 pas informacioneve nga autoritetet holandeze, belge dhe franceze që zbardhën komunikimet mes anëtarëve të grupit në rrjetet Enchro Chat dhe Sky. Në këto mesazhe, biznesmeni Pëllumb Gjoka, i arrestuar, ka kërkuar që 43-vjeçari Behar Bajri të vriste për 120 mijë € Klenthi Musabelliun, ish punonjës i policisë së burgjeve. Sipas dosjes, Behar Bajri ka komunikuar me Ervis Martinajn, ish-bosin e zhdukur të lojërave të fatit, dhe kanë shkëmbyer objektivët. Behar Bajri dhe Denis Borrici ekzekutuan Gjin Boriçin me porosi të Martinajt, dhe ky i fundit do të eliminonte Kleanth Musabelliun vrasje e cila nuk u realizua pasi shënjestra kuptoi planin.
Behar Bajri kishte planifikuar që të vriste dhe Ibrahim Licin dhe Genc Tafilin.
Behar Bajri u arrestua në shtator në Francë, pasi ishte mbajtur për rreth dy javë nën vëzhgim nga pala shqiptare dhe më pas kanë njoftuar autoritetet franceze për të kryer arrestimin. 43-vjeçari mësohet se u arrestua teksa ndodhej i vetëm në një lokal në Paris. Në momentin e ndërhyrjes, të njëjtat burime bëjnë me dije se ai nuk ka bërë rezistencë ndaj oficerëve të policisë, ndërsa nuk iu gjet ndonjë send i jashtëligjshëm me vete.
Policia konfirmon se Behar Bajri i është dorëzuar Drejtorisë së Përgjithshme të Burgjeve.
