Kryebashkiaku socialist i Kuçovës, Kreshnik Hajdari është marrë i pandehur nga Prokuroria e Posaçme SPAK.
Pas 1 orë e 30 minutash dëshmi brenda ambienteve të Prokurorisë së Posaçme, Kreshnik Hajdarit i është komunikuar akuza, neni 190/2 i K.Penal për “falsifikimin e formularëve”.
Një ditë më parë, Celibashi “shpëtoi” Kreshnik Hajdarin i cili pavarësisht shkeljes në formularin e “dekriminalizimit”, kjo nuk mjaftoi që kreu i KQZ-së t’i ndërpriste mandatin kryebashkiakut të Kuçovës.
SPAK e thirri Hajdarin, dy ditë pasi Prokuroria, nëpërmjet një shkrese, njoftoi se ai është dënuar në Greqi në vitin 1999, fakt që nuk e ka deklaruar në formularin e vetëdeklarimit. Sipas Prokurorisë, Hajdari rezulton që në 23 qershor të vitit 1999 është dënuar me vendim të formës së prerë nga Gjykata e Shkallës së parë të Janinës për hyrje në territorin grek pa leje.
Nga verifikimet e Prokurorisë, gjithashtu konfirmuar nga ministria e Drejtësisë greke, Kreshnik Hajdari rezulton i bashkëgjykuar i mitur dhe është dënuar me “masa riedukuese e qortimit”. Sipas drejtësisë greke, i pandehuri në atë kohë me statusin punëtor, ka qenë i pranishëm në procesin gjyqësor. Kjo çështje u shqyrtua një ditë më parë në Komisionin Qendror të Zgjedhjeve.
Tre juristët e koalicionit “Bashkë Fitojnë”, thanë se mjaftonte mos deklarimi në formularin e dekriminalizimit të dëbimit të zotit Hajdari në vitin 1999 nga Greqia për t’i ndërprerë mandatin. Madje ata ngulmuan se ai kishte konsumuar edhe një vepër penale.
Por, në fund, kryekomisioneri Ilirjan Celibashi shpjegoi se KQZ për të tilla raste tashmë e ka një praktikë të konsoliduar, duke vlerësuar se nuk ka një shkak ligjor që kryetarit bashkisë Kuçovë t’i ndërpritet mandati.
Ky vendim ka sjellë debate mes Celibashit dhe kandidatit të koalicionit “Bashkë Fitojmë” për Kuçovën, Lefter Maliqi i cili tha se vendimi është ‘i padrejtë duke e cilësuar si një turp të madh për KQZ-në’.
- Çfarë deklaroi avokati i Hajdarit pasi doli nga SPAK?
Kryebashkiaku i PS, Kreshnik Hajdari refuzoi të jepte shpjegime duke “kyçur gojën” përballë gazetarëve.
Ai autorizoi avokatin e tij, Theodhori Sollaku i cili u shpreh se klienti u pyet për një kallëzim e ngritur ndaj kryebashkiakut për fshehjen e dënimit në Greqi.
“Jo nuk është marrë i pandehur, dha shpjegime për kallëzimet që ka bërë subjektet politike për një pretendim 25 vite më parë që ka kaluar kufirin dhe është dënuar me qortim shoqëror. Nuk ka asnjë vendim të komunikuar dhe të deklaruar më përpara, edhe po të ishte e vërtetë, nuk ka asnjë konseguencë”, tha avokati i tij, Theodhori Sollaku.
Disa kallëzime radhazi/ Hajdari i Kuçovës thirret në SPAK, kryebashkiaku shoqërohet nga avokati
