Kryeministri Edi Rama mbrojti këtë të martë marrëveshjen me Italinë për strehimin në Gjadër të Lezhës të një pjesë të refugjatëve që kapen në ujërat e Mesdheut nga autoritetet italiane.
Në emisionin “Repolitix“, Rama tha se strehimi i refugjatëve në vend jo vetëm që s’ka efekte negative, por shtoi se për zonën do të ketë impakt pozitiv.
“Kur është vendosur vendi nuk është vendosur arbitrarisht por janë studiuar disa opsione. Është zgjedhur si vendi më i përshtatshëm edhe për shkak të terrenit ku kjo qendër do vendoset që është në krah të spitalit repartit ushtarak pranë aeroportit të Gjadrit. Është një operacion që për sa na takon së pari Shqipëria ofron hapësirën por nuk ka asnjë përgjegjësi të drejtpërdrejt e menaxhon të gjithën Italia. Edhe fondet janë të Italisë. E vetmja gjë që do impaktojë zonën është se ata njerëz që do strehohen aty do ushqehen do shërbehen dhe kjo do ti shërbejë zonës sepse zona, bizneset në zonë do kenë një klient të ri që do marrë ato shërbime. Të gjitha aspektet e tjera s’do kenë asnjë mundësi të impaktojnë sigurinë, qetësinë”, tha Rama.
“Më vjen për të vjellë kur ndesh disa që flasin për të zinj e flasin për shkatërrim të rracës e për lloj-lloj broçkullash të neveritshme”, theksoi ai.
Lidhur me kritikat se pse marrëveshja nuk është i prezantuar më herët opinionit publik, Rama tha se nëse do të ndodhte kjo do të krijohej konfuzion.
“Në momentin që është firmosur është bërë publike marrëveshja. Nëse do flitej pa u firmosur pa rënë dakord do kishte ngatërresa”, tha ai.
Lidhur me shkeljen e qëndrimit të mbajtur më herët teksa ka deklaruar se Shqipëria s’do të ngrejë struktura të tilla, ai u justifikua duke thënë se s’mund të refuzonte Italinë.
“E kam thënë se s’do përdorim një praktikë të tillë, por kur ta kërkon Italia është komplet diçka tjetër”, u shpreh.
Rama konfirmoi se kampi do të jetë një formë burgu. “Ata janë të mbyllur”, tha.
