Partia Socialiste ka kërkuar këtë të premte masë disiplinore për tre deputetë të opozitës, përkatësisht Elda Hoti, Saimir Korreshi dhe Lindita Metaliaj.
Ky vendim vjen pas seancës së djeshme plenare e cila u shoqërua me tensione të shumta e përplasje mes deputetëve. Ka qënë deputeti Saimir Korreshi ai i cili ka ndezur edhe tymuese në Kuvend, duke e mbushur sallën me tym, e duke penguar kështu zhvillimin e seancës. Në kërkesën për masë disiplinore që mazhoranca i ka dërguar Kuvendit, thuhet se Korreshi i mori tymueset nga dy deputete të tjera të opozitës, Hoti dhe Metaliaj.
“Kaosi i krijuar nga deputetë të caktuar të opozitës në seancën plenare të datës 09.11.2023 duke larguar nga vendet karriget dhe duke vendosur ato si barrikadë përpara foltores dhe duke e bllokuar atë është në kundërshtim me rregulloren e Kuvendit të Shqipërisë.
“Situata në sallën plenare u përkeqësua akoma më shumë kur deputeti Saimir Korreshi u pa të merrte disa tymuese nga çantat e dy zonjave deputete Elda Hoti dhe Lindi Metaliaj duke i ndezur ato dhe duke e bërë të pamundur dhe të vështirë zhvillimin normal të rendit të ditës dhe diskutimet e deputetëve të regjistruar”, thuhet në kërkesë.
Sakaq në orën 15:00 do të mbledhet Komisioni i Etikës, ku do të shqyrtohet kërkesa e socialistëve.
