Pas përmbytjeve të javës së kaluar, reshjet e kësaj të mërkure kanë sjellë të njëjtën situatë problematike në shumë zona të vendit.
Situata u shfaq e rënduar në kryeqytet, ku rrugët u mbuluan nga uji, duke vështirësuar kalimin për këmbësorët. Një makth ishte mëngjesi i sotëm për drejtuesit e mjeteve që përveç prezencës së ujit në rrugë u përballën me një trafik kaotik.
Prezencë uji raportohet edhe në disa godina në katet 0.
Problematike situata edhe në Durrës, ku uji mbuloi rrugët dhe trotuaret duke vështirësuar qarkullimin e këmbësorëve dhe mjeteve, kryesisht në zonën rreth stadiumit, Plazhit, Plepa dhe te “Ura e Dajlanit”. Uji deportoi edhe brenda qendrës shëndetësore në Sukth. Nuk janë raportuar për problematika në port, megjithatë autoritetet kanë ndaluar lundrimin e mjeteve të vogla dhe anijeve të peshkimit.
E njëjta panoramë edhe në Vlorë.
Përmbytjet u shfaqën më të rënda në lagjen “1 maji”, “24 maji”, disa zona në qendrën e qytetit, rruga “Transballkanike”, zona e “Albano e Romina”, teksa qytetarë mbetën të bllokuar brenda automjeteve.
Probleme edhe me lundrim, teksa është pezulluar nisja e tragetit Vlorë-Brindizi.
Po ashtu, është ndaluar lundrimi i anijeve të peshkimit dhe mjeteve të vogla.
Problematike me përmbytjen e rrugëve situata është shfaqur edhe në Fier, Lezhë dhe zona të tjera.
Në Mirditë, uji ka mbuluar oborret e disa banesave, teksa përroi i Zmejës doli nga shtrati.
Në aksin rrugor Skuraj-Burrel u bllokua rruga në fshatin Shkopet nga një rënie masive gurësh. E njëjta situatë në njësinë administrative Milot, në Kurbin.
Probleme me rënie të gurëve dhe inerteve janë shënuar në të tjera akse në veri të vendit si Bogë–Theth, Hani i Hotit-Tamarë, Dushaj–Lekbibaj, Kukës–Shishtavec, Bajram Curri–Valbonë, Vau Dejes–Pukë–Kukës, Skuraj–Ulëz. Problematika edhe në zonën e Shkëmbit të Kavajë.
Ndërprerje e energjisë elektrike është raportuar në Kukës, Tropojë, Shkodër dhe Fier.
Sinoptikanët paralajmërojmë vijim të reshjeve deri në orët e mbrëmjes së kësaj të mërkure. Pas një ndërprerje gjatë ditës së enjte, pritet rikthimi i të reshjeve dy ditët në vijim. E diela po ashtu parashikohet pa reshje, megjithatë pritet sërish reshje javën e ardhshme.
