Moti me erëra të forta dhe reshje ka sjellë problematika në zona të ndryshme të vendit.
Situata u shfaq kritike në kryeqytet orët e pasdites ku rrugët e mbuluar nga reshjet i përngjanin përrenjve, duke e bërë të vështirë qarkullimin për mjetet e kryesisht këmbësorët. Lana doli nga shtrati, ndërsa përveç akseve rrugore përmbytje pati edhe në katet e para të disa ndërtesave.
Uji u fut në biznese, banesa, shkolla, madje dhe autobusë urbanë. Banorët e prekur ja vënë fajin kanalizimeve, duke u shprehur se kjo e sotmja shënon herën e disatë që ata përmbyten.
Situata të ngjashme u shënuan në të tjera qytete të vendit, si Elbasan, Durrës, Lezhë, Shkodër, Krujë, etj. “Për shkak të reshjeve të dendura të shiut, ka patur rrëshqitje të dherave në aksin rrugor ‘Theth-Bregu i Lumit-Shalë-Shkodër’. Si pasojë ky aks rrugor është bllokuar dhe është ndërprerë qarkullimi i automjeteve”, njoftoi policia e Shkodrës. Vështirësi në qarkullim pati edhe në autostradën Tiranë-Durrës si dhe akse të tjera nacionale.
Era e fortë ka sjellë edhe rrëzim të pemëve në kryeqytet, shkëputje suvash të pallateve apo rënie të materialeve të tjera duke shkaktuar dëme materiale dhe të lënduar. Një efektiv policie në detyrë përfundoi në spital. “Rreth orës 13:00, në afërsi të pallatit me shigjeta, si pasojë e reshjeve, është shkëputur një objekt dhe ka dëmtuar në kokë shtetasin M.Xh., 37 vjeç, punonjës i Komisariatit të Policisë Rrugore, i planëzuar me shërbim. Shtetasi M.Xh. ndodhet në spital, nën kujdesin e mjekëve”, njoftoi policia e Tiranës.
Reshjet e dendura dyshohet të kenë ndikuar në dy aksidente me dy viktima të ndodhur në Fier dhe Rrugën e Kombit.
Policia e Shtetit ndërkohë njoftoi se ka kaluar në gatishmëri në të gjithë vendin. Zonat me risk më të lartë konsiderohen: Lezhë, rrugët urbane dhe rrugët interurbane lidhëse; Fushë Krujë, rrugët në zonën urbane dhe rrugët lidhëse interurbane; Tiranë, rrugët urbane dhe ato interurbane; Durrës. rrugët urbane dhe rrugët interurbane lidhëse me Tiranën dhe me pjesën tjetër jugore; Elbasan, rrugët në zonën urbane dhe rrugët interurbane lidhëse.
OSHEE njoftoi se shtrëngatat e shiut dhe shkarkesat atmosferike sollën dëme në shtylla, prezencë uji në kabina dhe stakime në disa linja 35kV dhe n/stacione. Nga raportimi i fundit, rezulton se kemi jashtë pune 71 fidera, ku më shumë se 85% prekin abonentë në zonat rurale. Problematika të furnizimit me energji elektrike konstatohen në zonat Fier, Kavajë, Tiranë, Kukës, Koplik, Gjirokastër dhe Vlorë.
Moti i keq, sipas sinoptikeve, vjen për shkak të stuhisë “Ciaran” që ka prekur Shqipëria, ndërsa situata parashikohet të jetë problematike edhe ditët në vijim. Të paktën deri ditën e martë, era e fortë dhe reshjet e shiut pritet të mbizotërojë në vend.
