GJKKO ka rrëzuar kërkesën e Sali Berishës për heqjen e masës së sigurisë, ndërkohë ka vijuar seanca për dhëndrin e ish-kryeministrit Berisha, Jamarbër Malltezit.
Avokati i ish-kryeministrit, Genc Gjokutaj tha për mediat se kanë bërë një kërkesë paraprake për përjashtimin e gjyqtares Irena Gjoka, si dhe kanë kërkuar heqjen e masës së sigurisë për Sali Berishën. Të dyja kërkesat e depozituara, u rrëzuan nga Gjykata.
Gjokutaj theksoi gjithashtu se gjykata ka rrëzuar kërkesën e tyre për humbjen e fuqisë së masave për shkak të tejkalimit të afateve për zbardhjen e vendimit.
Gjokutaj: “Ne kërkuam përjashtimin e gjyqtares, e dyta kërkesë. Një reagim krejt i ftohtë dhe një vendimmarrje si të gjitha të tjerat. Sigurisht kjo seancë ia vlejti për të dokumentuar shkeljen e radhës së gjykatës. Vendimi i zbardhur na u dha sot. Imagjinoni që vendimet janë të pa ekzekutuara, vendimet janë të pa depozituara në sekretarinë e gjykatës. Ndërkohë që Gjykata dhe Prokuroria flisnin sikur ato vendime janë komunikuar. Ne e konsiderojmë të pa ekzekutuar atë vendim, pavarësisht se këta i qëndrojnë shkeljes. Një gjykatë dhe një prokurori që shkel Kushtetutën, Kodin e Procedurës Penale e ka në dorë të dytë. Të dyja kërkesat janë rrëzuar.”
Për Sali Berishën është vendosur masa e sigurisë ‘detyrim paraqitje’ dhe bllokim i pasaportës të cilat janë kundërshtar fort nga lideri demokrat i cili nënvizon se GJKKO ka shkelur Kushtetutën.
Ndërsa dhëndri i ish-kryeministrit, Jamarbër Malltezi është arrestuar për privatizimin e ish-kompleksit Partizani. Masa e sigurisë detyrim paraqitje i është dhënë edhe ndërtuesit Fatmir Bektashi.
