Qeveria pretendon se bonusi i bebes është një politike demografike e suksesshme, por statistikat flasin për një realitet krejt të kundërt.
Përmes një postimi në rrjetin social “FB” këtë të martë, kryeministri Edi Rama u shpreh se qeveria po mbështet familjet e reja me bonusin e bebes. “Mbi 36 mijë familje kanë përfituar bonusin për të porsalindurit që nga 1 Janari i këtij viti. Edhe në buxhetin e vitit 2024, qeveria shqiptare do të vijojë të financojë Programin e Bonusit të Bebes, me një fond prej 2.2 miliardë lekë, duke mbështetur familjet që në hapat e parë të saj”, shkroi.
Më vonë gjatë ditës, në mbledhjen online të komisionit të çështjeve sociale, ministrja e Shëndetësisë, Albana Koçiu e quajti bonusin e bebes një politikë demografike të suksesshme.
“Bonusi i bebes është një tjetër politikë demografike e suksesshme, shtoi Koçiu. Në 2023-shin janë mbështetur mbi 36 mijë familje të reja dhe do të vijojë të zbatohet edhe në 2024 me një fond prej 2.2 miliardë lekë”, tha ministrja.
Shifrat që përgënjeshtrojnë qeverinë
A është vërtetë bonusi i bebes një politikë demografike e suksesshme?
Katër vite më parë, qeveria vendosi disa stimuj financiarë për nënat që sjellin në jetë fëmijë (40 mijë lekë për fëmijën e parë, me rritje progresive për fëmijën e dytë 80 mijë, për të tretin 120 mijë lekë, e kështu më radhë).
Me kalimin e viteve u provua se nisma nuk ndikoi në rritjen e numrit të lindjeve. Statistikat e INSTAT raportojnë për rënie të lindshmërisë në mënyrë periodike.
Të dhënat e fundit të Institutit të Statistikave që japin një panoramë të 6-mujorit të parë të vitit, treguan se për ketë periudhë lindjet shënuan rënie vjetore në shkallë vendi me 12.7%.
Ndër qytetet me statistika negative renditet tanimë edhe kryeqyteti. Vitin e kaluar, sipas të dhënave të INSTAT, në Tiranë lindën vetëm 8427 bebe me një rënie 10% në raport me vitin 2021. Rënia e lindjeve ishte më e larta e raportuar në dekadat e fundit. E njëjta tendencë ka vijuar edhe për pjesën e parë të këtij viti, periudhë gjatë së cilës INSTAT raporton për 3785 lindje. Shifër më e ulët se e njëjta periudhë e një viti më parë – 4345, më e ulët po ashtu se gjashtëmujori i dytë i vitit 2022, kur u regjistruan 4744 lindje.
Në aspektin demografik, veç rënies së numrit të lindjeve, ekspertët shohin si shqetësuese edhe shifrat e larta të emigrimit që janë shënuar përgjatë viteve të fundit, teksa vendi është nën qeverisjen e zgjatur Rama.
Në një artikull të publikuar së fundmi, ku përcillet mendimi i ekspertëve të fushës, “Zëri i Amerikës” raporton se të gjithë treguesit demografikë që ndikojnë në plakjen e popullsisë janë në përkeqësim të vazhdueshëm në Shqipëri, ndërsa ngrihet alarmi për pasoja të rënda në ekonomi.
“Mosha mesatare 39 vjeç, shtesa natyrore e popullsisë në prag të rritjes negative apo emigracioni i lartë, kryesisht i të rinjve, po e plakin me ritme të shpejta popullsinë. Sfidat sipas ekspertëve janë të mëdha, dhe vendi nuk është i përgatitur mjaftueshëm për t’u përballur me to. Ky fenomen ka prekur mjaft vende të zhvilluara, por studiuesit vërejnë se pasojat në Shqipëri janë më të rënda për shkak të një ekonomie më të dobët”, shkruan “VOA”.
