Kreu i PL-së, Ilir Meta ka reaguar lidhur me tensionet në kryesinë e Kuvendit këtë të hënë, ku punonjës së gardës penguan deputetët demokratë të hynin në ambientet e institucionit.
“Dënoj me ashpërsi militarizimin e institucionit më të rëndësishëm të Republikës, Kuvendit të Shqipërisë. Asgjësimi i të drejtave kushtetuese të opozitës është sulm ndaj pluralizmit politik dhe llogaridhënies para qytetarëve”, shkroi Meta në një postim në rrjetet sociale.
“Partia e Lirisë, shtoi më tej, mbështet vendosmërisht qëndrimin e opozitës e në veçanti:
- Garantimin e ngritjes të komisioneve hetimore në Kuvend;
- Të drejtën e opozitës për të zgjedhur përfaqësuesit e saj në Komisionin e Reformës Zgjedhore;
- Garantimin e shqyrtimit të të gjitha projektligjeve që opozita ka depozituar në Kuvend dhe që bllokohen prej vitesh”.
“Deputetët e opozitës përfaqësojnë zërin e mbi 700 mijë qytetarëve të cilët kanë të drejtë të dëgjohen. Kjo krizë e rëndë nuk zgjidhet me Gardën e Republikës por me respektimin e Kushtetutës dhe Rregullores të Kuvendit, si baza e funksionimit të demokracisë dhe shtetit të së drejtës”, përfundoi ai.
