Një 34-vjeçar shqiptar, është vrarë me armë zjarri në Itali. Ngjarja ka ndodhur në zonën Cuneo, në via Umberto, ku shtetasi i identifikuar si Klaudio Myrtaj, është gjetur i vdekur në një punishte artizanale.
Raportohet se i riu është qëlluar me pistoletë me silenciator, teksa ishte duke punuar në punishte dhe plumbi i ka prekur kokën.
Sipas raportimeve të mediave vendase, policia ka marrë fillimisht në pyetje drejtuesin e punishtes, i cili ka thënë se kishte shkuar për të marrë benzinë me traktorin e tij dhe kur është kthyer ka qenë një klient që i kishte thënë se kishte gjetur të riun e vdekur.
Hetimet
Karabinierët kanë marrë në pyetje edhe disa persona të afërm me viktmën, mes të cilëve edhe të dashurën e 34-vjeçarit. Deri më tani ende nuk janë zbardhur dëshmitë e të shoqëruarve, ndërkohë që pista kryesore ku po hetohet është ajo për motive xhelozie. Mësohet se kamerat e kanë fiksuar autorin që kreu vrasjen por identiteti i tij nuk dallohej. Ky i fundit ndodhet në arrati.
Myrtaj, kishte mbërritur në Itali rreth dy vjet më parë, dhe ishte punëtor në kantieret e rrugëve, duke bashkëpunuar herë pas here edhe me një zejtar vendas.
Në fshatin ku Klaudio ishte shpërngulur disa muaj më parë dhe jetonte në një shtëpi jo shumë larg vendit të krimit, ai mbahej mend si një punëtor i palodhur, gjithmonë i buzëqeshur, që i përshëndeste të gjithë dhe gjithmonë kishte marrëdhënie të mira me ata që e takonin, shkruajnë mediat vendase.
Ende nuk dihen arsyet e ngjarjes së rëndë, ndërsa rasti është nën hetim nga autoritetet.
