Ashtu siç pritej, opozita ka vijuar aksionin opozitar duke mos lejuar zhvillimin e seancës së sotme parlamentare në Kuvend. Deputetët e PD-së kanë përmbysur karriget e deputetëve të mazhorancës tek foltorja.
Por, deputeti socialist, Xhemal Qefalia e ka marrë karrigen me forcë, madje duke dhunuar edhe deputetët e PD-së. Ai është përplasur fizikisht me deputetin Edmond Spaho, pasi në një moment e ka shtyrë në mënyrë të dhunshme.
“O Xhemal mos qëllo, na vrave”, – i është drejtuar deputetja Ina Zhupa në një moment Qefalisë
“Karriget s’janë tuajat janë të popullit o Xhemal”, ka thënë një nga deputetët e PD-së.
Më pas, Xhemal Qefalia ka arritur që të marrë me forcë një nga karriget dhe është ulur në vendin e tij.
