Kaosi ka përfshirë sërish Kuvendin e Shqipërisë ditën e sotme pak minuta para nisjes së seancës parlamentare. Deputetët e opozitës të udhëhequr nga Sali Berisha kanë përmbysur karriget në mes të sallës së Parlamentit.
Kryedemokrati Berisha shprehet në Kuvend se këto që po i ndodhin opozitës s’kanë ndodhur as në vitet e fundit të diktaturës.
Berisha paralajmëron se nëse nuk rikthehen të drejtat kushtetuese të opozitës, nuk do të ketë më Parlament.
“Kanë siguruar mandatet me banda, të cilët të tmerruar nga komisionet hetimore për të zbuluar të gjitha vjedhjet, të gjitha lidhjet e tyre me krimin. Kjo nuk është çështje midis deputetëve, por është një çështje midis deputetëve të Partisë Demokratike dhe Edi Ramës. Ne jemi këtu; o e kthejmë Kushtetutën ose nuk tërhiqemi. Rikthimi i të drejtës së opozitës për ngritjen e komisioneve hetimore, rikthimi i të drejtës së opozitës për anëtarët e saj në komisionin e refermës zgjedhore. Ka muaj që kjo bandë pas meje mban në sirtar ligjin për minimumim jetik. Atë nuk e lejojnë këta hajdutë që janë këtu mbrapa që janë bërë milionerë duke u vjedhur ju. Ndaj nuk lejojnë komisionet hetimore, nuk lejojnë ligjin për minimumin jetik. De fakto kanë shumëzuar me zero deputetët e opozitës. Garantoj edhe socialistët që këto ligje janë në të mirë të shqiptarëve. Çfarë të drejte kanë këta të përzgjedhin anëtarët e komisionit të reformës zgjedhor. Kjo nuk ka ndodhur as në vitet e fundit të diktaturës. O riktheni të drejtat kushtetuese të opozitës ose Parlament nuk ka.”- tha Berisha.
