Komisioni Qendror i Zgjedhjeve (KQZ) në Kosovë ka akredituar 28 media vendore dhe ndërkombëtare për mbulimin e zgjedhjeve lokale që do të mbahen më 12 tetor 2025. Vendimi u mor gjatë mbledhjes së 66-të të këtij viti dhe u miratua me procedurë qarkulluese, pas vlerësimit të dokumenteve dhe rekomandimit nga Zyra për Regjistrim, Certifikim dhe Kontroll Financiar të Subjekteve Politike.
Në procesin e verifikimit janë përfshirë edhe institucione të tjera si Këshilli i Pavarur për Media dhe Këshilli i Mediave të Shkruara në Kosovë, të cilat kanë dhënë informacionet e nevojshme për vlerësimin e mediave aplikante.
Pas vendimit të KQZ-së, Misioni i OSBE-së në Kosovë reagoi duke e përshëndetur “ngrohtësisht” përfshirjen e mediave në gjuhën serbe dhe të atyre të komuniteteve të tjera, duke e cilësuar si një hap që forcon transparencën dhe parimet gjithëpërfshirëse në procesin zgjedhor.
“Ky hap gjithëpërfshirës forcon parimet e transparencës, barazisë dhe lirisë së medias – elemente thelbësore për zgjedhje të lira dhe të drejta”, thuhet në reagimin e OSBE-së.
Organizata theksoi gjithashtu se qasja në informacion në të gjitha gjuhët e komuniteteve është një komponent kyç i kuadrit shumetnik dhe demokratik të Kosovës.
“Sigurimi i mundësive të barabarta për të gjitha mediat forcon besimin e publikut në procesin zgjedhor dhe mbështet pjesëmarrjen e informuar në nivel komuniteti,” shtoi OSBE.
Në përmbyllje, Misioni i OSBE-së në Kosovë nënvizoi se mbetet i përkushtuar për të promovuar dhe mbrojtur lirinë e shprehjes, pluralizmin mediatik dhe qasjen e barabartë në informacion për të gjitha komunitetet, në përputhje me standardet ndërkombëtare.
