Janë zbardhur diskutimet në mbledhjen me dyer të mbyllura të grupit parlamentar të Partisë Demokratike të mbajtur në Kryesinë e Kuvendit pasditen e djeshme.
Kreu i PD-së, Sali Berisha u është drejtuar deputetë se dosja e ish-kompleksit Partizani është e montuar dhe se shumë dokumente janë të falsifikuar. Berisha u theksoi demokratëve se kjo është një çështje personale për të dhe se grupi nuk duhej të përzihej.
“Sa i përket çështjes sime me SPAK, do i përgjigjem çdo pyetje që mund të keni për mua për t’ju dhënë informacion. Por ju them se kjo dosje është e montuar dhe unë me prova e fakte do e ç’montoj, pasi aty ka shumë falsifikime. Dua që kjo çështje të më takojë vetëm mua, është personale dhe nuk dua të përziej asnjë tjetër, as grupin”, tha Berisha.
GJKKO ka caktuar masën detyrim paraqitje dhe i ka bllokuar daljen jashtë vendit Berishës në lidhje me hetimet për privatizimin e ish-kompleksit Partizani, ndërsa dhëndri i tij, Jamarbër Malltezi ndodhet në burg.
